Vielha, 3 d’agost de 2018.- Eth Passeig dera Libertat de Vielha acuelherà es dies 16,17,18 e 19 d’agost ua naua edicion dera Hèira d’Artesania dera Val d’Aran “Hèt a man, hèt aciu”, qu’organize eth Conselh Generau d’Aran damb era collaboracion dera Deputacion de Lhèida, Foment Torisme Val d’Aran, er Ajuntament de Vielha e Mijaran, era l’Associació d’Artesans i Artistes de la Val d’Aran, productors dera mèrca de garantia “Productes de la Val d’Aran” e dera Associacion de Cases de Pagés ena Val d’Aran.

Es visitants ara hèira poderàn apropar-se as estands entà crompar es diferenti productes, e ath delà, pes tardes, grani e petiti poderàn gaudir des talhèrs e demostracions d’elaboracion de sabons e saus de banh, pastissaria, reciclatge, bijuteria e pentura, entre d’auti, a cargue des madeishi mestieraus.

Anna Díaz, conselhèra de Torisme e Desvolopament Economic d’Aran, a explicat qu’aguesta hèira mestierau servís entà hèr conéisher, tant as aranesi coma era gent que mos visite pendent er ostiu, es diferenti sectors artesanaus dera man des sòns productors qu’ath delà son representants d’ua importanta activitat deth comèrç locau.