• Aguesta conferéncia permetèc hèr a conéisher HèPIC coma exemple de projècte entath desvolopament des territòris ruraus e coma airina entà balhar solucions as problematiques actuaus mejançant era innovacion.

Eth passat dijaus 7 d’abriu auec lòc ena Sala de Justícia der Ajuntament de Morella (Castelló),  era presentacion deth projècte deth Centre d’Innovacion Territoriau de Castelló. Eth coordinador tecnic de HèPIC assistic ad aguest eveniment entà explicar eth foncionament e estratègies deth centre d’innovacion en Aran.

Aguest acte organizat pera Diptuació de Castelló, auie coma objectiu hèr a conéisher coma es zònes ruraus se pòden organizar e integrar enes naues dinamiques economiques a trauès dera innovacion e era emprenedoria. Seguint aguesta linha, s’a anonciat era creacion d’un nau centre enes comarques de Es Ports e er Alt Maestrat. Era intencion d’aguesti centres d’innovacion rurau serà promòir era activitat economica e crear iniciatives innovadores dauant es rèptes actuaus de manèra responsabla damb eth territòri.

Entre es assistents i ère eth secretari generau entath Rèpte Demografic, Francés X. Boya Alós, eth baile de Morella, Rhamsés Ripollés Puig, eth president dera Diputació de Castelló, José Martí García, eth deputat provinciau de Desvolopament Rurau, Santiago Pérez Penarroya, eth director adjunt dera Agència Valenciana contra era Despoblacion, Evaristo Martí Vilaró e eth coordinador tecnic det HèPIC, Guilhèm Piris Casasnovas, que presentèc eth centre d’innovacion ena Val d’Aran. Pendent era sua exposicion soslinhèc era importància dera collaboracion entre es agents publics, privats e deth tresau sector entà poder bastir un hilat de trabalh conjunt. Hèt, que permeterà crear sinergies e intercambi d’idees entà realizar projèctes o resòlver inquietuds compartides.

Damb era participacion en aguest tipe d’actes, HèPIC se consolide coma un exemple d’iniciatives innovadores en entorn rurau. En aguest sens, era sindicad’Aran, Maria Vergés Pérez, a manifestat que: “eth govèrn d’Aran ei fòrça satisfet de coma HèPIC va auançant e se va consolidant, e pròva d’açò, ei era bona acuelhuda qu’a auut pendent es diuèrsi actes e eveniments enes que s’a presentat aguest centre d’innovacion en Aran. Eth Conselh Generau contunhe trabalhant entà impulsar era innovacion e era retencion deth talent deth nòste territòri”.

Mès a mès, HèPIC apòste pes collaboracions damb d’auti centres d’innovacion entà trebalhar amassa en un contècte globau. Tal e coma anoncièc eth secretari generau Boya “ei er inici d’un camin que mos permeterà auer uns motors de desvolopament en mèdi rurau, que formen part d’un gran hilat damb capacitat de generar intelligéncia territoriau, creant un ecosistèma en quau sigue possible retier eth talent, ajuntant as empreses e persones emprenedores que volguen actuar en territòri”.

HèPic ei resultat deth procès de participacion ciutadana Aran Accion 2020/2030 impulsat peth Conselh Generau, e a coma objectiu balhar supòrt e acompanhament a naui emprenedors/es e a projèctes relacionats damb era innovacion. Tà contactar-i: infohepic@aran.org.