• Lèu un centeat de persones an responut ath qüestionari publicat deluns entà remassar informacion sus es principaus preocupacions des aranesi deuant era crisi deth COVID-19 e es sues prepauses entà afrontar es rèptes que plantege aguesta crisi entara activitat economica dera Val d’Aran 

Laguens des accions plantejades pera iniciativa Aran Accion 20/30, aguest deluns eth Conselh Generau d’Aran publiquèc un qüestionari digitau entà remassar informacion sus es principaus preocupacions des aranesi e araneses deuant era crisi deth COVID-19 e es sues prepauses entà redirigir o reorientar era activitat economica dera Val d’Aran.

Lèu un centeat de persones a participat en tot respóner aguesta enquèsta, tant particulars coma entitats, particularament interessats enes sectors torisme, espòrts, comunicacion, agroalimentacion, naues tecnologies e servicis. En mens de 48 ores s’an recebut propòstes fòrça interessants e era poblacion s’a mostrat fòrça participatiua damb aguest projècte.

Cau rebrembar qu’aguesta ei era prumèra accion dera iniciativa Accion Aran 20/30, e qu’eth qüestionari se poirà respóner enquiath dia 5 de mai. Un còp remassada aguesta informacion, s’organizaràn grops de trabalh entà debàter conjuntament de quina forma se pòt bastir un front comun qu’eth Conselh Generau d’Aran e d’autes administracions publiques poguen impulsar amassa.

Aguesta iniciativa, amassa damb eth projècte especific destinat ath sector toristic, an d’èster eth punt de partida d’un procès de mès long recorrut que permete generar un plan d’accion entà desvolopar un modèl territoriau de futur entara Val d’Aran.

Rebrembam qu’entà quinsevolh dubte, vos podetz dirigir via email a: r.barella@aran.org.