Es ciutadans prepausen mesures coma er ampliament der airau d’urgéncies, er acompanhament psicologic des pacients e dera familha o era creacion dera figura d’eth “pacient expèrt” (pacient guarit)

Vielha, 11 d’octobre de 2018.- Un nombrós grop de professionaus der àmbit dera sanitat e es servicis sociaus aranesi e de representants d’associacions, institucions e ciutadans a títol particular, an participat ena Residéncia Sant Antòni de Vielha, en procès participatiu entà elaborar eth Plan Estrategic deth Servici Aranés de Benéster e Salut 2018-2023.

Era presentacion dera jornada deth procès participatiu a anat a cargue dera conselhèra de Salut e Benéster d’Aran, Anna Díaz, qu’a arregraït era implicacion tant de ciutadans coma des professionaus aranesi en aguest procès e eth supòrt deth Departament de Salut dera Generalitat de Catalonha.

Era directora deth SABS, Mª Angels Borràs, a estat era encargada de presentar es trèti generaus deth Plan Estrategic, qu’ei, didec, er estrument territoriau de diagnostic, identificacion de besonhs, planificacion de scenaris d’organizacion e accions entà desvolopar ena Val d’Aran.

Eth Plan contemple es linhes estrategiques e projèctes singulars per un periòde de 5 ans, qu’i a entre eri: Desvolopar estrategies entà implementar eth modèl d’atencion centrada enes persones; era atencion sanitària accessibla, resolutiva e integrau; implementar un modèl d’atencion integrau e centrada enes persones damb malauties croniques e damb besonhs complèxi; era creacion d’un nau modèl d’atencion primària e salut comunitària en Aran; era aplicacion dera salut digitau en estructures assistenciaus; er abordatge dera violéncia maschista, infantila e es persones granes; implementar era reabilitacion domiciliària e incrementar eth supòrt ath pacient oncologic; era incentivacion e fidelizacion deth personau assistenciau; e eth desvolopament deth plan d’inversions: infrastructures e equipaments, entre d’auti.

Dempús dera exposicion des linhes deth Plan Estrategic, a començat eth procès participatiu, dividit en dus grops, eth des professionaus sanitaris e eth dera ciutadania e associacions, qu’an començat a debàter es sues aportacions.

Entre es conclusions qu’an arribat des professionaus dera sanitat e der àmbit des servicis sociaus, destaquen en çò que tanh ath modèl: Incrementar era formacion des professionaus, escuélher es cargues directius per competéncies, implementar era telemedecina e trabalhar per objectius.

En àmbit assistenciau: Desvolopar er espitau de dia quirurgic, melhorar era coordinacion damb es professionaus de dehòra dera Val d’Aran, qu’es professionaus autoctòns melhoren es sues competéncies e formacion, atau coma respectar era opinion des pacients.

En çò que tanh as recorsi: Incrementar es recorsi economics e umans des equipes, sustot des oncologics, melhorar er atractiu des places entà atrèir boni professionaus, utilizar es farmacies coma agents de salut e er ampliament des servicis d’urgéncies, entre d’auti.

En aguesti tres àmbits, es professionaus sanitaris e assistenciaus tanben an hèt aportacions des deth punt de vista intèrn. Entre eres: era creacion de grops multidisciplinars, hèr formacion de formadors, trabalhar e actualizar es protocòus existents, melhorar era gestion deth temps, auer disponibilitat entà realizar sojorns en d’auti centres, formacions especifiques e melhorar es recorsi umans e materiaus existents, atau coma era melhora des espacis de trabalh.

Es ciutadans e representants d’associacions araneses pera sua part an hèt tanben tota ua seria de prepauses entà incorporar ath Plan Estrategic. Entre eres: Er ampliament der airau d’urgéncies, eth besonh d’implementar er acompanhament psicologic des pacients e dera familha, era major implicacion des ajuntaments e er increment dera cession d’espacis assistenciaus per part d’aguesti, era creacion dera figura d’eth “pacient expèrt” (pacient guarit), en acompanhament des pacients, incrementar es inversions en TIC, ena atencion a neonats e er aquesiment de maquines entà diabetics, evitar ath maximal laguens çò de possible es desplaçaments dehòra dera Val d’Aran e era creacion d’ua unitat d’especializacion de traumatologia esportiua ena Val d’Aran, entre d’auti.

Tant es professionaus coma ciutadans coïncidiren en fòrça des besonhs de futur en àmbit sanitari e assistenciau dera Val d’Aran.

Ua des conclusions qu’an arribat amassa es participaires en procès participatiu, a estat eth besonh qu’eth Plan Estrategic deth Servici Aranés de Benéster e Salut 2018-2023, s’elabore e s’amie ara practica de manèra rigorosa. En aguest sens, era directora deth SABS, Mª Angels Borrás, a auançat qu’eth Plan Estrategic serà redigit abans de finalizar enguan 2018.