• Era sindica d’Aran, Maria Vergés, e era presidenta deth Parlament, Laura Borràs, an presidit aguest acte d’inauguracion laguens dera commemoracion dera Hèsta d’Aran, en quau era sindica d’Aran a profitat entà reivindicar eth besonh de mantier e melhorar er autogovèrn aranés e entà demanar complicitat deth Parlament entà consolidar era autonomia d’Aran

Aguest meddia a auut lòc, en Parlament de Catalunya, era inauguracion dera exposicion ‘Conselh Generau d’Aran, 30 ans d’autogovèrn’, presidida pera sindica d’Aran, Maria Vergés, e era presidenta deth Parament, Laura Borràs, e ara qu’an assistit tanben es conselhèrs e conselhères de govèrn Juan Antonio Serrano, Fracés Bruna e Angelina Cases, atau coma eth secretari prumèr, Ferran Pedret, era secretària dusau, Aurora Madaula e eth secretari tresau, Carles Riera, ath delà de deputats de disparièrs grops politics.

“Deth Conselh Generau d’Aran ençà èm plan satisfets qu’eth Parlament de Catalunya acuelhue aguesta exposicion sus eth 30 aniversari dera recuperacion dera nòsta maxima institucion, coma ua forma d’apropar era realitat d’Aran e eth sòn autogovèrn as representants laguens d’aguesta cramba” asseguraue era sindica d’Aran, en tot híger que: “ pensam qu’ei indispensable hèr pedagogia sus era singularitat d’Aran entà poder arténher ues majors còtes de reconeishement e respècte ath nòste autogovèrn”.

Ena sua intervencion, era sindica d’Aran a volut destacar era delicada situacion que trauèsse era nòsta lengua pròrpria: “er aranés viu ua situacion d’extrema gravetat e a arribat era ora d’estar-ne conscients e actuar damb rapidesa e, tanben, damb fermesa” e higie que: “tà evitar era mòrt dera nòsta lengua ei de besonh compdar damb recorsi e mieis damb es qu’actuaument non compdam, e tanben damb complicitat politica e institucionau e damb militància sociau. Ei per aquerò que coma sabetz, deth govèrn deth Conselh Generau d’Aran auem sollicitat ara Generalitat de Catalunya, per un costat, era revision deth traspàs competenciau en matèria de lengua e cultura entà actualizar-lo, pr’amor qu’en mès de 30 ans non s’a revisat, e per aute, reajustar era relacion entre Conselh e Generalitat entà possar eth lideratge deth Conselh Generau d’Aran en aguesta matèria”.

Era exposicion que commemòre es 30 ans dera reinstauracion dera maxima institucion aranesa se poirà visitar pendent 15 dies ena planta baisha deth Palai deth Parlament.