Vielha, 1 de junhsèga de 2016.- Des d’aué e enquiath dia 7 de gèr de 2017, se pòt visitar ena glèisa de Sant Joan d’Arties era exposicion “Istòria grafica d’Aran”, qu’includís un conjunt inedit de fotografies que repassen es hèts quotidiani, familhaus e sociaus dera Val d’Aran ath long deth temps que se pòt recuélher a trauès dera memòria fotografica.

Era exposicion organizada pera Fondacion Musèu Etnologic dera Val d’Aran, damb era collaboracion deth Conselh Generau d’Aran, Musèus dera Val d’Aran e er Archiu Generau d’Aran, a supausat dus ans de trabalh entàs organizadors de revision e d’eleccion des fotografies.

Ena exposicion que siguec presentada ager per Rosa María Salgueiro, presidenta dera Fondacion e per Luís Carlos Medina, vicesindic d’Aran, s’exposen 130 fotografies que van des de 1900 enquia arribar as nòsti dies, dividides en sèt apartats desparièrs que rebaten e dan a conéisher ua part dera memòria collectiva dera Val d’Aran.

Era exposicion se poderà visitar en Sant Joan d’Arties des d’aué 1 de junhsèga enquiath 7 de gèr de 2017, de deluns a dissabte de 17 a 20 ores; e deth 11 de junhsèga a 11 de seteme, en orari d’ostiu de 17 a 21 ores.