Vielha, 16 de junhsèga de 2018.- Aué s’a inaugurat eth Centre d’Interpretacion dera Artiga de Lin qu’eth Conselh Generau d’Aran aufrís as visitants ua coneishença mès prohonda deth valor naturau d’aguesta zòna unica dera Val d’Aran.
Era entrada en foncionament deth Centre d’Interpretacion coïncidís damb er inici deth tren toristic dera Artiga de Lin e era entrada en vigor deth contròl d’accès motorizat ena zòna, que començarà eth diuendres 20 de junhsèga e s’alongarà enquia mejans de seteme.
Eth nau Centre d’Interpretacion daurirà cada dia a compdar des 09:00 enquias 18:00 ores, en tot coïncidir damb er orari deth tren toristic. Es tickets deth tren toristic se poderàn aquerir en Centre d’Interpretacion ath prètz de 2 èuros entàs adults e 1 èuro es mendres d’onze ans. Es mainatges menors de 3 ans an er accès gratuït e eth viatge entà mascòtes costarà 1 èuro. Es visitants dera Artiga de Lin qu’utilizen eth tren toristic poderàn visitar eth Centre d’Interpretacion en tot abonar 0,50€, mentres qu’entath rèste des visitants eth prètz dera entrada serà d’1 €. Es mainatges e mainades menors d’onze ans poderàn visitar eth Centre de manèra gratuïta.
Eth Centre d’Interpretacion dera Artiga de Lin hè un recorregut per desparièrs àmbits dera zòna a compdar des glaciacions que modelèren era Ribèra dera Artiga hè 50.000 ans, enquiara fauna e era flòra autoctòna, en tot passar peth neishement des Uelhs deth Joeu, era istòria dera Ermita dera Artiga de Lin e er antic Espitau, era rota d’Es Bòrdes, de pastors, traficants, excursionistes e refugiats, pr’amor que siguec ua des rotes utilizades pes persones qu’artenhien escapar des nazis pendent era Dusau Guèrra Mondiau, es curiositats des insèctes e es rotes de senderisme familhau que se pòden realizar.
Eth Centre d’Interpretacion dera Artiga de Lin aufrís ar usatgèr ua visita interactiva qu’utilize er audiovisuau e es naues tecnologies entà transméter enquiath darrèr detalh dera visita.
Ara inauguracion a assistit eth sindic d’Aran Carlos Barrera, acompanhat deth conselhèr de Governacion e baile d’Es Bòrdes, Frances Medan; eth conselhèr de Territòri, Jose Antonio Boya; eth de Agricultura, Ramaderia e Miei Naturau, José Enrique Arró; e era conselhèra de Torisme e Desvolopament Economic Anna Díaz; ath delà de representants dera societat aranesa coma eth president deth Grèmi d’Ostalaria dera Val d’Aran, Ambròs Barberà.
Eth sindic d’Aran a destacat era importància qu’a eth Centre d’Interpretacion dera Artiga de Lin en çò que tanh ar equilibri territoriau d’Aran.
Entath sindic d’Aran, eth Centre d’Interpretacion dera Artiga de Lin ven a completar es iniciatiues deth Govèrn d’Aran en aguest bèl paratge aranés coma son es sendèrs dera Aigua, eth nau Refugi dera Artiga de Lin, qu’ei previst qu’entre en foncionament pendent eth mes de seteme, era connexion damb era rota aranesa der Aneto, era connexion damb eth Hospice de França, eth tren toristic, era abilitacion dera zòna de parcatge e era Ermita dera Artiga de Lin.
