Eth Conselh Generau d’Aran, mejançant era Conselheria d’Empresa e Territòri, comencèc a finaus der an 2013 era implantacion dera recuelhuda organica e un desplegament important de contienedors d’envasi en Baish Aran e en Vielha e Mijaran.

“Totun, es quantitats remassades de matèria organica enquiath dia d’aué non an estat es qu’auéssem desirat, e ei per aguesta arrason, que des deth Conselh Generau d’Aran tornaram a hèr préner consciéncia as vesins dera importància de hèr aguest triatge” soslinhec eth conselhèr de Territòri, Eduardo Valdecantos.

Eth Conselh Generau d’Aran a previst pendent aguesti mesi campanhes de conscienciacion entara recuelhuda de residus organics damb es grani productors, restaurants e òtels, atau coma entre es vesins d’Aran tà mielhorar es ràtios en aguest encastre.

En aguest sens, pendent aguesta sason d’ostiu se procedirà a un aute desplegament de contienedors d’envasi atau coma ara implantacion dera recuelhuda organica en municipi de Naut Aran, actuacion entara quau eth Conselh Generau d’Aran compde damb eth supòrt dera Agéncia Catalana de Residus.

Per un aute biais, cau destacar “era important creishuda dera recuelhuda d’envasi provocada pera distribucion de mès contenedors auriòus en Vielha e en Baish Aran e era collaboracion des vesins en triatge d’aguest residu”, informèc eth conselhèr Eduardo Valdecantos.
.
Er incremement dera recuelhuda d’envasi en aguesti darrèri mesi a estat fòrça important, passant d’ua mieja de 4000 kg/mes de recuelhuda d’envasi a uns 8.800 kg/mes.

“Eth reciclatge ei un ahèr de toti, sense era collaboracion des nòsti vesins non poderam arténher es objectius que cerque eth Conselh, qu’era Val d’Aran sigue un territòri capdauanter en reciclatge” a remercat Valdecantos.