-
A compdar de deman, 19 de març, se daurís era tempsada de pesca ena Val d’Aran
Eth Conselh Generau d’Aran a publicat dejà er edicte que da per dubèrta era tempsada de pesca 2022 ena Val d’Aran a compdar de deman, 19 de març, enes aigües de saumònids (trueita comuna) de baisha montanha. En nauta montanha començarà a compdar deth 1 de mai e enes lacs a compdar der 1 de junh.
Sonque se poirà realizar era activitat dera pesca enes trams abilitats a tal efècte e publicats enes mapes editats peth Conselh Generau d’Aran. Eth nombre maxim de captures autorizades per pescaire e dia se manten e ei proporcionau ara densitat de trueita actuau. En referencia as mesures de captura, se manten eth criteri de establir ua talha maxima de trueita (mesura a partir dera quau cau retornar eth peish ar arriu), era finalitat ei preservar era fraccion d’edats reproductores en es nòsti arrius.
Enguan, en tot escotar es prepauses dera Societat de Caça e Pesca dera Val d’aran coma nauetat, s’an realizat petites modificacions en es trams damb mòrt e sense mòrt der Arriu Garona, er objectiu d’aguestes modificacions ei facilitar er accés e fomentar era pesca entre es mès joeni apròp des nuclèus urbans.
Tanben cau rebrembar qu’er usatge deth plom e sòles de feutre ena pesca ei proïbit e qu’ei obligatòri portar pescadèra.
En airau de Miei Ambient dera plana web deth Conselh Generau d’Aran se poiràn expedir es licéncies de pesca valides entara Val d’Aran e era rèsta de Catalunya, e tanben es permisi diaris especifics tà cada zòna de pesca controlada.