• A compdar d’aué, 12 de junhsèga, e enquiath 12 de seteme, tornen es activitats culturaus e visites guidades e teatralizades as musèus e glèises mès emblematiques dera Val d’Aran

Aué, 12 de junhsèga, eth Conselh Generau d’Aran, a trauès de Musèus Val d’Aran, encete ua naua sason d’ostiu, plea d’activitats, visites guidades e teatralizades e exposicions. Un ample ventalh de possibilitats entà gaudir dera cultura e istòria deth nòste territòri.

Equipaments dubèrts pendent era setmana

Deth 12 de junhsèga enquiath 12 de seteme, eth Musèu dera Val d’Aran de Vielha, er Ecomusèu Çò de Joanchiquet de Vilamòs e eth Musèu deth Corrau de Bagergue seràn dubèrti de deluns a dimenge. Pera sua part, eth Musèu dera Nhèu de Unha se mantierà dubèrt de deluns a dissabte.

Ath delà, coma cada an, s’amiaràn a tèrme visites guidades ena Mina Victòria d’Arres, era Fabrica dera Lan de Vielha, era Mòla de Salardú e era Mòla de Unha.

S’amiaràn a tèrme tanben visites guidades ath Petit Musèu dera Escòla d’Arròs damb reserva previa e aforament limitat a 10 persones (entà reservar se pòt telefonar ath 973 64 25 69 o ben enviar un corrèu electronic a acvallaran.cultura@gencat.cat).

Rota Romanica

Coma cada an, pendent aguest ostiu tanben se realizaràn visites guidades de deluns a dissabte as glèises de Sant Andrèu de Salardú, Santa Maria de Cap d’Aran de Tredòs, Santa Maria d’Arties e Santa Eulària de Unha. De dimèrcles a dissabte se realizaràn visites guidades ena glèisa de Sant Fèlix de Vilac, es dijaus ena glèisa de Sant Pèir d’Escunhau, es diuendres en Sant Fèlix de Bagergue e es dissabtes ena de Sant Estèue de Betren.

Enguan, coma nauetat, tanben s’aufrissen visites as roïnes deth Santuari de Mijaran, en Vielha, que siguec un des centres religiosi mès importants pendent era epòca medievau en Aran e que siguec destruït pendent era Guèrra Civiu.

Ath delà, es glèises dera Purificacion de Bossòst, Sant Miquèu de Vielha, Santa Maria de Vilamòs, Sant Blas e Sant Joan de Les, se mantieràn dubèrtes tot eth dia, dera madeisha manera qu’era glèisa Sant Fèlix de Bagergue (a compdar deth 15 de junhsèga de 11 a 19 ores), exceptat en orari de visites guidades.

Exposicions temporaus

Era exposicion “Conselh Generau d’Aran. 30 ans d’autogovèrn”, inaugurada damb motiu dera celebracion des 30 ans dera reinstauracion deth govèrn d’Aran, se poirà visitar de manera gratuïta de dimèrcles a dissabte de 17 a 20 ores en Santuari de Santa Maria de Mijaran.

En Ecomusèu çò de Joanchiquet de Vilamòs se poirà gaudir tanben entre es dies 22 de junhsèga e 6 de seteme dera exposicion “Llum a l’ànima. Palmira Jaquetti, 1985-1963”.

Activitats

Es dimèrcles 28 de junhsèga, 11 e 25 d’agost, s’amiarà a tèrme era activitat “Es carrèrs des nòsti pairs-sénhers”, ua passejada peth centre istoric de Vielha, en tot explicar coma èren abantes es carrèrs, cases e establiments dera zòna.

D’un aute costat, es deluns 19 de junhsèga, 2, 9, 16, 23 e 30 d’agost, “Es croniques de Rufina”, visites teatralizades ar Ecomusèu çò de Joanchiquet dera man de Noemí Busquets, que interpretarà eth personatge de Rufina Monge, era hemna der erèu dera casa.