• Es usatgèrs dera Residéncia Sant Antòni e eth personau sanitari e essenciau dera Residéncia e er Espitau Val d’Aran, atau coma eth de transport sanitari, an estat es prumères persones en recéber aué era prumèra dòsi dera vacuna de Pfizer

Aguest maitin s’a iniciat eth plan de vacunacion contra era COVID-19 ena Val d’Aran gestionat peth Departament de Salut dera Generalitat de Catalunya. Ath torn de 200 persones, entre eres 42 residents e usatgèrs deth centre de dia dera Residéncia Sant Antòni, an recebut aué era prumèra dòsi dera vacuna de Pfizer, qu’a estat administrada per personau sanitari deth pròpri Departament de Salut desplaçat enquia Aran.

“Aué ei un dia important e fòrça demorat entath nòste territòri, pr’amor que dam eth prumèr pas combàter era pandemia e inmunizar ara poblacion de mès risc e era mès expausada ath virus”, afirmaue era sindica d’Aran, Maria Vergés, en tot híger que: “es diuèrses fases d’administracion dera vacuna vien definides peth Departament de Salut e demoram qu’enes pròplèu setmanes se vacunen tanben es persones depenentes e, finaument, ara poblacion en generau”.

Dempús d’aguesta prumèra dòsi dera vacuna, ei previst administrar-ne era dusau en ues tres setmanes, apuprètz. Seguint eth plan de vacunacion establit era vacuna a d’arribar a tota era poblacion de manèra progressiva en diuèrses etapes, en tot priorizar eth risc des diferents collectius, er hèt de considerar-se personau essenciau o eth risc de transmission dera malautia.

Era sindica d’Aran a hèt tanben ua crida entà que “era ciutadania aranesa se vacune quan arribe eth moment, pr’amor qu’ei ua vacuna segura e era unica manèra d’arténher era immunitat de grup e recuperar cèrta normalitat enes nòstes vides”.