• Er objectiu d’aguest projècte, frut d’un convèni de collaboracion entre eth Conselh Generau d’Aran e Endesa, ei installar sensors entà modelar e evaluar en temps es variables fisiques entà preveir futurs risqui potenciaus ena zòna, coma er esbauçament produsit en an 2018

• Eth conselhèr Josep Canut, qu’a visitat aué es trabalhs de perforacion, a destacat: “era importància qu’an entath Conselh Generau d’Aran es donades que se remassaràn damb aguest sistèma d’alèrtes entà melhorar era seguretat des persones e infraestructures en aguesta zòna”

Eth Conselh Generau d’Aran e Endesa an signat un acòrd de collaboracion damb eth quau meten en foncionament en diuèrsi punts dera val de Valarties diuèrsi equips de mesura entà alertar de possibles risqui geologics naturaus, coma es esbauçaments. Aguesti sensors, nomentats piezomètres, mesuren era pression der aigua freatica des diferents capes geologiques deth terren, de manèra que se’n pòden monitorizar es resultats e hèr que actuen coma sistèmes de contròl.

“Es donades qu’eth Conselh Generau d’Aran obtierà d’aguesti sensors installadi per Endesa mos permeteràn auer un seguiment des possibles alèrtes e ua major capacitat de reaccion deuant hèts coma es produsidi en aguest madeish endret en an 2018” explicaue eth conselhèr d’Economia, Torisme e Promocion Economica, Josep Canut, en tot híger que: “entath govèrn d’Aran era seguretat dera nòsta ciutadania ei primordiau e credem que damb aguest nau sistèma podem melhorar-la e garantir-la deuant des risqui geologics”.

Eth detonant d’aguest projècte ei eth desprendiment que i auec er 11 de mai de 2018 e qu’afectèc ar arriu Valarties, era pista, es depòsits d’aigua deth pòble d’Arties e diuèrses finques privades. Totun, aguest non a estat er unic accident geologic deth parçan e, segontes informes tecnics, s’a constatat que istoricament i a auut d’auti movements de massa. Er objectiu, per tant, no ei sonque detectar vessants dera madeisha val de Valarties que podessen èster afectades per potenciaus esbauçaments, senon garantir era seguretat dera poblacion e es infraestructures en aguesta zòna.

Per tant, aguest hilat de sensors s’installaràn ena zòna d’influéncia der aqüifèr dera val de Valarties. En totau, se bastiràn 3 potzi -dus d’eri d’entre 30 e 60 mètres de prigondor e un aute de 120 mètres de prigondor, e 15 cm de diamètre- laguens des quaus se plaçaràn es piezomètres que proporcionaràn informacion dera evolucion dera pression freatica enes diferents estrats geologics, es canvis dera quau s’associen as desprendiments. Eth seguiment d’aguestes donades permeterà as tecnics modelar eth comportament der aqüifèr entà establir uns lindaus que poguen alertar deth risc potenciau de naui esbauçaments ena zòna.

Procediment

Entara installacion des piezomètres se realizen 3 sondegi en diferents coordenades, tostemp ena part dera montanha. Pr’amor dera orografia deth terren s’a estudiat, en cada cas, era manèra optima de realizar-les, damb er objectiu de non maumeter er entorn naturau e protegir er ecosistema existent. Dera madeisha manèra, s’abilite un punt verd a on depositar es residus que se generen pendent era òbra, aguesti residus se classificaràn degudament e s’acumularàn en contenedors especiaument premanidi entara sua tipologia. En finalizar es trabalhs, se procedirà a recuperar eth terren e tornar-lo ar estat originau, entà deishar eth menor rastre possible des trabalhs amiadi a tèrme.

Eth convèni, qu’a ua vigéncia de quate ans, a un pressupòst de 105.500 euròs, des quaus eth Conselh n’apòrte 15.500 e era rèsta Endesa. En aguest sens, Endesa execute eth projècte (qu’aurà ua durada d’uns 60 dies apuprètz) e eth Conselh Generau gestionarà es donades e harà eth seguiment scientific.