Eth sindic d’Aran, Carlos Barrera, acompanhat deth conseller d’Interior dera Generalitat, Ramon Espadaler, e dera conselhèra de Torisme, Comèrç e Consum d’Aran, Anna Díaz.

Eth sindic d’Aran, Carlos Barrera a signat dus convènis damb eth conseller d’Interior dera Generalitat de Catalunya, Ramon Espadaler. Eth prumèr convèni servirà entà melhorar es salvaments e er escandilhament d’incendis e eth dusau, entà enfortir eth sistèma de proteccion civiu ena Val d’Aran.

Eth prumèr acòrd, a coma objectiu eth renauiment deth servici des Pompièrs segons es besonhs actuaus dera societat aranesa.

Es Pompièrs d’Aran an ua relacion dirècta damb era sala centrau des Pompièrs dera Generalitat a Bellaterra (Barcelona), donques qu’era Val d’Aran ei considerada ua unitat foncionau de caractèr especific adscrit dirèctaments ara Direccion Generau.

Eth dusau convèni, establís era contractacion d’un tecnic, finançat peth Departament d’Interior, entà per’mor d’ajudar as Ajuntaments dera Val d’Aran entara elaboracion des plans de proteccion civiu.

Eth Conselh Generau d’Aran compde damb ua infrastructura d’atencion as emergéncies damb capacitat entà assumir prètzhèts tecnics de supòrt ara implantacion des plans de proteccion civiu dera Generalitat de Catalunya en territòri dera Val d’Aran.