Eth Conselh Generau d’Aran e era Deputacion de Lhèida an organizat un cors de formacion destinada as trabalhadors des entitats locaus encargadi e responsables deth desvolopament dera Lei dera Transparéncia, damb er objectiu qu’aguesti trabalhadors dera foncion publica artenhen ua coneishença juridica e des obligacions legaus dera Lei, atau coma conéisher era informacion a publicar entà introdusir-la en Portau dera Transparéncia e arténher ua coneishença tecnica e practica deth Portau dera Transparéncia entàs entitats locaus, qu’entrarà en foncionament eth pròplèu 1 de gèr de 2016.
Es naues tecnologies s’an convertit en un excellent estrument entà aumentar eth grad de transparéncia des administracions deuant es ciutadans, que cada dia exigissen accèssi mès clari e dirèctes entà conéisher es recorsi e era gestion des administracions locaus.
Aguesta exigéncia coïncidís damb çò establit ena naua Lei 19/2014 de transparéncia, accès ara informacion publica e bon govèrn. Entà complir era nòrma, totes es administracions incorporaràn enes sues respectives webs un portau de transparéncia que s’aufrirà des d’eth informacion accessibla, precisa e complèta.
Era Deputacion de Lhèida, en coordinacion damb era Generalitat e es autes deputacions catalanes, an trabalhat entà dessenhar era estructura e es contenguts d’aguesti portaus web.
Se tracte d’un portau web que meterà a posita de toti enquia 130 donades, qu’engloben tèmes coma era descripcion dera activitat publica, er organigrama, es percepcions economiques deth personau e des cargues, eth pressupòst, es subvencions e convènis, donades estadistiques e de compdabilitat.
Pera sua part eth Conselh Generau d’Aran, ja a fòrça auançades es prètzhèts d’entratge des donades en Portau dera Transparéncia, entà que pogue entrar en foncionament ena Val d’Aran eth dia 1 de gèr der an pròplèu, encara qu’er entratge complèt des donades se harà de forma progressiua pendent es prumèrs mesi de 2016, tau e coma expliquèren es responsables deth Portau dera Transparéncia dera Deputacion de Lhèida pendent era jornada de formacion.
