• Pendent era amassada s’an tractat es diuèrsi ahèrs en comun d’aguesti servicis damb Aran per çò que hè ara gestion des emergéncies e es rèptes de futur qu’ei de besonh encarar

Aué a agut lòc ua jornada de trabalh entre era conselhèra d’Igualtat, Salut e Benèster, Maria Vergés, era directora deth Servici Aranés de Benèster e Salut (SABS), Mª Àngels Borràs, eth major de Pompièrs Emergéncies, Manel Bosch, e eth director tecnic de Pompièrs Emergéncies, Fran Cardeñes, amassa damb diuèrsi representants deth Servici d’Emergéncies Mediques (SEM) e CatSalut, entre eri era gerent de CatSalut en Naut Pirenèu e Aran, Divina Farreny e eth gerent deth SEM, Antoni Encinas.

Aguesta jornada a estat un prumèr contacte entre es organizacions ena quau s’a realitzat un seguiment deth convèni entre eth SABS e eth SEM entara gestion des emergéncies mediques. Pendent aguesta amassada s’an sajat de detectar quines son es actualitzacions de besonh en aguest conveni.

Era conselhèra Vergés a mostrat “era volentat qu’a eth Conselh Generau d’Aran de trabalhar conjuntament e establir ua bona relacion damb aguesti dus organismes entà poder trobar e resòler aqueri punts de melhora que siguen de besonh entà garantir un servici de qualitat en Aran”.

En matèria de sanitat cau informar tanben qu’aguest dijaus, 31 d’octubre, eth sindic d’Aran, Francés Boya, e conselhèra d’Igualtat, Salut e Benèster, s’amassaran damb era conselhèra de Salut dera Generalitat de Catalunya, Alba Vergés, entà tractar ahèrs primordiaus entara sanitat aranesa.