Ena Jornada, impartida peth Departament d’Agricultura, Ramaderia, Pesca, Alimentacion e Medi Naturau dera Generalitat de Catalonha, an assistit Agents de Medi Naturau d’Aran, Pompièrs d’Aran e Mòssos d’Esquadra.
Ena Val d’Aran s’an localizat enguan 3 nins de vèspes asiatiques.
Era Val d’Aran a acuelhut ua Jornada formativa de contròl de vèspa asiatica entà minimizar es damatges causadi ena apicultura e ena biodiversitat a cargue deth Còs d’Agents Ruraus (CAR) dera Generalitat de Catalonha. Era Jornada a compdat damb era preséncia deth conselhèr d’Agricultura, Ramaderia e Medi Naturau d’Aran, Jose Enrique Arró.
Est an passat se localizèren e destruïren en Catalonha 150 nins, aguest 2016 s’an destruït 21 sonque en zònes urbanes.
Es Agents Ruraus dera Generalitat an explicat as assistents (Agents de Medi Naturau d’Aran, Pompièrs d’Aran e Mòssos d’Esquadra) era situacion dera vèspa asiatica qu’arribèc en Catalonha eth 2012 e es mesures qu’an de préner a nivèu locau, coma unica possibilitat de minimizar es damatges d’aguesta predadora d’abelhes.
Ena Val d’Aran s’an localizat enguan 3 nins de vèspes asiatiques.
Entara destruccion des nins, es Agents Ruraus an metut en practica tres metòdes qu’an resultat eficaci qu’, ath delà, tostemp se realizen en moment de major seguretat, de net, quan totes es vèspes son en nin e i a mens activitat.
S’eth nin ei fòrça accessible, -que non ei fòrça abituau- es agents, equipadi damb un vestit parièr ath des apicultors, ac retiren manuauments, tiren insecticida e ac congèlen entà assegurar era mòrt de toti es individus.
S’eth nin ei ena copa d’un arbe d’enquia uns 14 mètres, s’utilizen uns penjadors que, a manèra de seringa, injècten biocida en sòn interior.
Quan eth nin ei plaçat en ua zòna inaccessible deth bòsc, entre quate e cinc agents tiren simultanèaments diuèrsi tirs damb escopetes de perdigalhs petiti e atau s’assegure era totau destruccion dera colònia.
Maugrat açò, per se bèth exemplar auesse pogut escapar, se placen arratères damb “atraient” ath torn d’a on ère eth nin entà capturar es pòqui exemplars qu’agen pogut subervíuer.
Ath delà dera sua grana capacitat entà reprodusir-se e estener-se, favorida pera sua facila adaptacion a entorns naturaus que li son favorables e pera abséncia de predadori naturaus, eth principau perilh dera vèspa asiatica ei era sua voracitat.
Entà alimentar-se an de besonh proteïnes e idrats de carbòni, es prumères les cèrque en tot tipe d’insèctes, mès sustot enes abelhes, -que representen mès d’un 80 % dera sua neuritud- e es segons ena fruta.
Vielha, 23 de noveme de 2016
Conselh Generau d’Aran: Núria Sanjuan