Eth director generau d’Agricultura e Ramaderia deth Departament d’Agricultura, Ramaderia, Pesca, Alimentacion e Miei Naturau, Miquel Molins, amassa damb era tecnica d’Agricultura e Ramaderia deth Conselh Generau d’Aran, Judit Jaquet, an presentat era jornada tecnica dedicada ath coitiu dera poma e ara presentacion deth Plan de biodiversitat entara recuperacion des varietats tradicionaus.

Molins a destacat qu’”eth govèrn dera Generalitat cre qu’era agricultura de montanha a futur e qu’eth coitiu dera poma de nautada cada còp ei mès apreciat e demandada peth mercat, que reauments ei un cultiu emergent e que donques era jornada a de servir a hèr eth prètzhèt d’informacion e d’acompanhament dera administracion entà per’mor de méter a disposicion deth sector totes es nauetats e caracteristiques deth coitiu.”

Era jornada a compdat damb es melhors especialistes dera IRTA e deth Departament d’Agricultura qu’an explicat quines expectatives i a e quines possibilitats de rendabilitat a era poma de montanha.

Atau madeish, Molins a mostrat era sua satisfaccion entà poder presentar peth prumèr còp ena Val d’Aran eth Plan de biodiversitat cultivada, que supause era recuperacion, era conservacion e era comercializacion des varietats locaus, qu’an potenciau de futur e que tanben a d’ajudar a revitalizar era activitat agrària donques qu’eth consumidor identifique coma valors positius es de montanha.

Fin finau eth director a felicitat era iniciatiua d’amiar entà deuant era prumèra jornada de transferéncia tecnologica ena Val d’Aran organizada entre era Generalitat e eth Conselh Generau, e a exprimit era sua disposicion de contunhar en tot trabalhar amassa es naues jornades tecnologiques en favor deth sector agrari d’Aran.