Tecnics deth Conselh Generau d’Aran e especialistes en sanetat forestau dera Generalitat de Catalunya s’amassen entà tractar er estat fitosanitari des bòsqui aranesi

Eth Conselh Generau d’Aran a acuelhut ua Jornada sus sanetat forestau ena Val d’Aran, damb er objectiu de revisar es principaus plagues e malauties qu’afècten o poden afectar as ecosistèmes pirenencs e actualizar era metodologia d’avaloracion dera afectacion dera processionària.

Era presentacion dera Jornada a anat a cargue deth conselhèr de Territòri d’Aran, Jose A. Boya, e a compdat damb es ponents: Jorge Heras (Servici Gestion Forestau), Josep Maria Riba (Biologista, especialista en sanetat vegetau), Pedro Carballal (Servici de Gestion Forestau) e Jordán Muñoz (CTFC).

Entre d’auti ahèrs s’a tractat era processionària (Thaumetopoea pityocampa) e eth grad d’afectacion ena Val d’Aran. “En mes de gèr se realizèrem tractaments dera processionària en diuèrsi bòsqui dera Val d’Aran” a manifestat Gemma Arjó, tecnica forestau deth Conselh Generau d’Aran.

Vielha, 22 de hereuèr de 2019

Conselh Generau d’Aran: Núria Sanjuan