Acte olimpisme coma motor de desvolopament territoriau-13 noveme
-
Toti es ajuntaments aranesi s’an aderit ad aguesta declaracion institucionau, conscients der impacte positiu que poirie auer entath territòri, e demostrant atau eth compromís dera Val d’Aran damb aguesta candidatura
Eth passat 10 de seteme eth Conselh Generau d’Aran se convertie ena prumèra institucion en aprovar en plen, per unanimitat, ua declaracion institucionau en favor dera candidatura olimpica des Pirenèus tàs jòcs d’iuèrn de 2030.
“Eth govèrn d’Aran vò èster ua institucion activa entà arténher era hita d’aguesta candidatura olimpica, conscients coma èm der impacte positiu que poirie auer entath territòri era celebracion d’un eveniment d’aguest tipe, e ac volem hèr amassa damb era rèsta de territòris deth Pirenèu” afirmaue era sindica d’Aran, Maria Vergés, en tot híger que: “ei per aguest motiu qu’auem hèt arribar as institucions e administracions publiques deth Pirenèu catalan e aragonés aguesta declaracion institucionau, entà qu’aqueri qu’atau ac volguen s’i poguen aderir e mostrar un front conjunt de supòrt as Jòcs Olimpics d’iuèrn de 2030”.
Enquiath moment, un totau de 67 administracions (deputacions, Comarques e ajuntaments) s’an aderit ad aguest manifèst, entre eri, toti es Ajuntaments dera Val d’Aran. En aguest sens, era sindica d’Aran manifestaue que “èm fòrça satisfets dera respòsta, que demòstre qu’eth territòri ei pera labor d’impulsar aguesta candidatura e èm convençudi qu’arribaràn mès declaracions de supòrt”.
Eth Conselh Generau d’Aran a hèt a arribar aguesta declaracion institucionau a:
- Eth govèrn d’España
- Era Generalitat de Catalunya
- Eth govèrn d’Aragón
- Eth Comitat Olimpic Espanhòl (COE)
- Eth Comitat Olimpic Internacionau (COI)
- Er Ajuntament de Barcelona
- Er Ajuntament de Saragossa
- Era Reiau Federacion Espanhòla d’Espòrts d’Iuèrn (RFEDI)
- Era Reiau Federacion Espanhòla de Gèu (FEDHielo)
- Eth Conselh Superior d’Espòrts (CSD)
