Lucas Eguibar e Laro Herrero, snowboarders membres des estructures esportiues dera Reiau Federacion Espanhòla Espòrts d’Iuèrn (RFEDI), an estat entrenant tres dies ena estacion aranesa qu’es dies 19 e 20 de març serà era sedença dera darrèra pròva deth circuit de Copa deth Mon de snowboard cross (SBX), a on Eguibar se proclamèc campion era passada sason.

Era dimenjada deth 20 e 21 de hereuèr e deth 27 e 28, son es pròplèus cites mondiaus entàs riders, en Sunny Valley (Russia) e PyeongChang (Corèa).

Era tresau e quatau setmana de hereuèr, era estacion russa de Sunny Valley e era coreana de PyeongChang, arreceberàn dus eveniments dera copa deth mon mès espectacular: era de SBX. Es riders de RFEDI s’an entrenat deth 10 ath 12 de hereuèr ena estacion dera Val d’Aran damb era vista metuda enes següentes cites mondiaus, qu’afronten damb fòrça motivacion. Eth tresau esportista dera equipa, er andalós Regino Hernández non a pogut assistir per lesion.

Lucas Eguibar se mostraue illusionat que Beret sigue era sedença dera pròva mondialista pr’amor que “pòrti venguent fòrça ans e ei pròp de casa, ja estongui dident a tota era mia familha e amics que venguen a animar” e a hijut que “mos cau demostrar en Espanha qu’aguest espòrt vau era pena e que i a estacions qu’apòsten per açò”. En çò que tanh as dies d’entrenament a explicat qu’ “ara auem estat sajant era nhèu, non auem pogut trabalhar ena pista definitiua pr’amor qu’eth boardercross cambiarà considerablaments entà adaptar-se ara nòrma FIS”. De cara as pròplèus competicions “me les prepausi damb fòrça desir e sò fòrça motivat, enes prumères qu’auem disputat è hèt errors mès è estat trabalhant e sabi qu’en tot hèr ues carrères mentauments bones pogui arténher un bon resultat e escalar posicions en classament”.

Eth càntabre Laro Herrero explicaue qu’ei era dusau concentracion d’entrenament que hèn en Baqueira e qu’ei important soslinhar eth tracte arrecebut. De cara ara Copa deth Mon a comentat que “mos hè fòrça illusion que se celèbre aciu, ath delà auem pogut veir a on serà era pista e hèr-mos ua idèa de coma serà eth circuit, entà nosati açò ei un fòrça bon”. Herrero, que patic ua tombada ena darrèra pròva de Feldberg aguesta setmana a tornat a meter-se sus era taula, e tot e que non se trape ath 100% recuperat, assegure qu'”afronti era pròva damb era intencion d’èster çò de mès tà deuant possible e er objectiu ei lutar peth podium. Jamès auem estat en Sunny Valley ne en Corèa, son estacions naues entà nosati mès auem illusion, pr’amor qu’ath delà PyeongChang ei a on se celebraràn es Jòcs Olimpics de 2018, atau que poderam veir com ei aquerò”.

Eth tecnician de SBX de RFEDI, Israel Planas que les a acompanhat en aguest desplaçament a assegurat qu’ “eth hèt d’auer ua Copa deth Mon aciu en Baqueira tà jo ei incredible, era estacion cada còp mos ajude mès, en tot facilitar-mos es entrenaments e es concentracions”. Planas a arregraït que s’acuelhe era pròva e totes es facilitats que les an dat “açò ei perfècte entà ua equipa qu’a corredors de diferentes parts d’Espanha”. E a volut arrebrembar que “La Molina tostemp a daurit es sues pòrtes en aguest aspècte e mos a ajudat fòrça, mès tot ei un trabalh en equipa, tant pera RFEDI, coma pes dues estacions e se podem amiar entà deuant aguesta Copa deth Mon ei gràcies a que toti auem hèt plan ben eth nòste trabalh”.

En tot divisar es Mondiaus Sierra Nevada 2017

Entath Campionat deth Mon de snowboard e freestyle que se celebrarà ena estacion granadina era sason que ven, Eguibar a comentat qu'”ei ua estacion que m’encante, Andalosia entièra m’agrade fòrça e creigui qu’ac montaràn fòrça ben pr’amor qu’an fòrça desir de hè’c e qu’era gent veigue que non sonque en esquí, se non qu’en snowboard e en freestyle tanben i a esportistes espanhòus qu’amien entà deuant”. Herrero, qu’a arrebrembat era sua setau plaça enes Mondiaus de Kreischberg’15 a assegurat qu’ “en següent mondiau, eth 2017 en Sierra Nevada, è era illusion de hè’c parièr o melhor qu’en Àustria”.

Dempús des prumères copes celebrades en Montafon (Àustria) e Feldberg (Alemanha), Lucas Eguibar se place 8au en classament (870 pts). Regino Hernández, tanben membre dera equipa RFEDI e que seguís recuperant-se dera lesion enes X Games de hè dues setmanes, ei eth 34au (126 pts) e Laro Herrero, 37au (102 pts). Es riders que lideren eth classament son eth rus Nikolay Olyunin (2400 pts), eth francés Pierre Vaultier (1980 pts) e er austrian Alessandro Haemmerle (1590 pts).

Palmarés

Lucas Eguibar (Fed. Basca) eth donostiarra deth club Promosport guanhèc eth “Globo” de Veire dera Copa deth Mon, era passada sason, ena disciplina de snowboard cross dempús d’arténher un aur e un argent enes Copes deth Mon de Veysonnaz’15 e un 9au lòc en La Molina, a on se proclamèc guanhador deth circuit. Ath delà enes Jòcs de Sochi 2014 artenhec eth diplòma olimpic en classificar-se en 7au lòc.

Lucas debutèc ena Copa deth Mon era sason 2011-12 e pòrte 19 pròves en aguesta categoria damb 4 podiums (Arosa’13 – 3au e Vallnord-Arcalís’14 – 2au, ath delà des dus podiums de Veysonnaz’15). Eth 2013 artenhec coronar-se campion deth Mon Júnior.

Laro Herrero (Fed. Càntabra) eth càntabre deth club Tajahierro que comencèc era sua trajectòria ena Copa deth Mon eth 2009, dejà a disputat 20 pròves d’aguest circuit. A participat en 3 Campionats deth Mon: La Molina’11, Stoneham’13 e artenhec eth 7au lòc ena finau de Kreischberg’15. Eth rider tanben acumule uns Jòcs Olimpics de Sochi’14 en sòn istoriau.

Vielha, 12 de hereuèr de 2016

Conselh Generau d’Aran: Núria Sanjuan

Informacion facilitada per: Baqueira Beret