Maria Vergés, escuelhuda sindica d’Aran

Era Casa deth Senhor d’Arròs a acuelhut aué era constitucion deth nau Conselh Generau d’Aran, un Plen a on Maria Vergés a estat escuelhuda coma sindica d’Aran per majoria absoluta
Era sindica d’Aran elècta a manifestat pendent eth sòn discors d’investidura eth sòn compromís damb eth país, es aranesi e araneses e era institucion e a assegurat que trabalharà entà qu’era ciutadania d’Aran veigue en Conselh Generau d’Aran a ua institucion fòrta, modèrna e empatica, qu’ei indispensabla entà melhorar era sua qualitat de vida e entà deféner eth sòn present e futur e dera que se’n senten orgulhosi e orgulhoses
Era presa de possession a compdat, entre d’autes autoritats e convidadi, damb era preséncia dera presidenta deth Parlament de Catalunya

Aguest meddia a auut lòc, ena Casa deth Senhor d’Arròs, eth Plen de constitucion deth nau Conselh Generau d’Aran dempús des eleccions municipaus e ara maxima institucion aranesa deth passat 28 de mai.

En aguest Plen, es tretze conselhèrs e conselhères an prometut eth cargue e posteriorament, atau coma dispause er article 41.1 dera Lei de Regim Especiau d’Aran, s’a elegit damb majoria absoluta (damb es vòts des nau conselhèrs d’UA) a Maria Vergés coma sindica d’Aran entàs pròplèu quate ans.

Er acte qu’a compdat damb era preséncia dera presidenta deth Parlament, Anna Erra, eth delegat deth govèrn der Estat en Catalunya, Carlos Prieto, eth secretari generau entath Rèpte Demografic, Paco Boya, eth secretari de Govèrns Locaus e Relacions damb Aran, David Rodríguez e eth president dera Deputacion de Lleida entre d’autes autoritats e convidats.

“Preni aguesta responsabilitat damb eth major des respèctes ath país, ara gent e ara institucion, e ac hèsqui amassa damb es magnifics conselhèrs e magnifiques conselhères deth Conselh Generau d’Aran, as quaus voi tanben arregraïr eth sòn compromís e trabalh pera Val d’Aran e era sua ciutadania” manifestaue era sindica electa en sòn parlament, a on tanben a volut destacar que vò “trabalhar entà qu’es aranesi e araneses veiguen en Conselh Generau d’Aran a ua institucion fòrta, modèrna e empatica, ua institucion qu’ei indispensabla entà melhorar era sua qualitat de vida e entà deféner eth sòn present e futur, e voi que se’n senten orgulhosi e orgulhoses”.

En aguest sens, Vergés afirmaue: “voi renauir eth ligam emocionau damb era tèrra e damb eth país, adaptar-lo as naui tempsi e, bastir un Aran de toti e tà toti. Perque, non podem parlar d’Aran coma país se non se govèrne Aran coma un país”, en tot hèr emfasi ena importància qu’a desvolopar es maximes quòtes d’autogovèrn a traués d’un desplegament efectiu dera Lei de Regim Especiau d’Aran entà poder amiar a tèrme ua gestion dera proximitat ençà entà, qu’age coma objectiu méter as persones en centre des accions e des politiques.

Tanben destacaue que “Aran ei ua realitat nacionau, dotada de lengua e cultura, d’autogovèrn e institucions pròpries e ei era nòsta obligacion defener-les e aunorar-les, mès sonque des deth convenciment e consciéncia de qu’auem de besonh empatia e complicitats”, en tot esténer era man a collaborar damb era rèsta de territòris deth Pirenèu damb qui Aran compartís rèptes de futur, atau coma damb es govèrns catalan e espanhòu. “Trabalharam per ua Val d’Aran fòrta, que s’impulse tà deuant damb fermesa mès tanben damb solidaritat e esperit de collaboracion damb era rèsta de territòris e institucions”.

Cossent damb es resultats electoraus, era composicion deth Conselh Generau d’Aran sorgida des urnes ei era següenta: 9 conselhèrs d’Unitat d’Aran e 4 conselhèrs de Convergéncia Aranesa.

Eth Conselh Generau d’Aran serà format per 13 conselhèrs e conselhères distribuïdi enes sies terçons istorics:

Terçon de Pujòlo. 2 membres:

-Mgfc. Sr. César Ruiz- Canela Nieto (CA)

-Mgfc. Sr. Francisco Bruna Capel (UA)

Terçon d’Arties e Garòs. 2 membres:

-Mgfc. Sr. Òscar Canut Cònsul (CA)

-Mgfc. Sr. José Canut Herraiz (UA)

Terçon de Castièro. 4 membres:

-Mgfca. Sra. Maria Vergés Pérez (UA)

-Mgfc. Sr. Juan Antonio Serrano Iglesias (UA)

– Mgfc. Sr. Javier Cavero Sáez (UA)

-Mgfca. Sra. Rosa Maria Salgueiro Pujòs (CA)