Marta Cester e Imanol Rojo se proclamen guanhadors dera 41au Marxa Beret

Un dimenge damb temperatures fòrça nautes a acuelhut era 41au edicion dera competicion populara d’esquí de hons mès multitudinària d’Espanha enes distàncies de 10, 21 e 42 km
A nivèu competitiu, dissabte se disputèren es Campionats d’Espanha Sprint Salolmon e dimenge a estat eth dia dera demorada Marxa Beret, puntuable entara Copa d’Espanha d’esquí de hons e que forme part deth calendari FIS de Longa Distància, un totau de 900 corredors en tota era dimenjada

Dempús d’ues darrères edicions damb fòrtes nheuades, era Marxa Beret 2020 serà rebrembada per ua meteorologia magnifica en Pla de Beret. Er eveniment s’a desvolopat ena zòna centrau deth Pla, er airau d’Òrri e era zòna pròplèu a Montgarri, mès sense arribar-i.

Era gessuda en massa de mès de 800 participants a estat espectacular coma en cada edicion, damb es esportistes d’elit ena zòna de dauant damb fòrça ganes de pujar a un pòdium qu’a estat fòrça disputat.

Ena categoria reina, era aranesa Marta Céster (CAEI-FCEH), damb 2h.39m.46, e eth tanben resident en Aran, Imanol Rojo (Uzturre-RFEDI-NKEF-FVDI), damb 2.01.23, s’an impausat damb autoritat. Andús an guanhat dejà diuèrsi viatges aguest eveniment e saben ara perfeccion coma dossificar-se en un traçat tan long entà arténher entrar es prumèri ena meta, a on les demorauen familhars e amics.

En hemnes era dusau en entrar per meta enes 42 km a estat era francesa Perrine Abadie damb 2.57.07, seguida per Henar Etxeberría (RNCAL-FNDI) damb 3.09.35. En òmes, Sadurní Betriu (CEFUC-FCEH) a quedat dusau damb 2.08.40, e tresau damb 2.09.01 a entrat Sigmund Rimstad.

Era victòria des 21 km a estat tà Irati Cuadrado (Irrintzi-FNDI) damb 1.07.31 e Gerard Palomo (CEFUC-FCEH) damb 57.54. Ena distància mès cuerta, es 10 km, an artenhut er aur era aranesa Marta Moreno (CAEI-FCEH) damb 28:03 e Roc Vilaró (Bellver-FCEH) damb 24.58.

Pera sua part, es campions d’Espanha d’Sprint de dissabte, en gran eveniment patrocinat per Salomon en eliminatòries de 6, sigueren en categoria absoluta Irati Cuadrado (Irrintzi-FNDI) e Gral Sellés (Bellver-FCEH-RFEDI). En U16 Alaia Juaristi (Uzturre-FVDI-NKEF) e Roc Vilaró (Bellver-FCEH). En infantil U14 Martina Sellés (Bellver-FCEH) e Peio Añarbe (MGSTZ-FVDI-NKEF).

Era Marxa Beret ei fòrça mès qu’ua competicion, ei ua des pròves d’esquí nordic mès consolidades que se realizen en país. Mes enlà des esportistes d’elit, era majoria des participants pertanhen a un public familhar e grops d’amics que se la prenen coma era hèsta der esquí de hons.

Aguest eveniment ei organizat peth Conselh Generau d’Aran, Baqueira Beret e er Ajuntament de Naut Aran. Compde damb era collaboracion dera associacion de Volentaris Val d’Aran, Audi, Coca Cola, Powerade, Salomon, Obra Social la Caixa, Diputació de Lleida, Conselh Esportiu Val d’Aran, Comerco, OC Studio, Aran Salut, Era Escòla, La Roche-Posay, PowerBar, AECC, Mossos d’Esquadra, Aneto, InterSport Viella, ath delà dera Real Federación Española Deportes de Invierno (RFEDI) e era Federació Catalana d’Esports d’Hivern (FCEH).