Marta Cester e Sadurní Betriu se proclamen guanhadors dera 42au Marxa Beret

FOTOTUR

Dempús d’auer estat ajornada un an pr’amor dera situacion sanitària, aué ua meteorologia fòrça bona a acompanhat era 42au edicion dera competicion populara d’esquí de hons mès multitudinària d’Espanha enes distàncies de 10, 21 e 42 km
A nivèu competitiu, dissabte se disputèren es Campionats d’Espanha Sprint Salolmon e aué dimenge a estat eth dia dera demorada Marxa Beret, puntuable entara Copa d’Espanha d’esquí de hons e que forme part deth calendari FIS de Longa Distància, ath torn de 950 corredors en tota era dimenjada

Dempús d’un an ajornada pr’amor dera pandèmia, era demorada 42au edicion dera Marxa Beret s’a celebrat damb ues condicions meteorologiques magnifiques en Plan de Beret. Er eveniment s’a desvolopat en Beret, Òrri, Montgarri e direccion Marimanha.

Era gessuda en massa de lèu 800 participants a estat espectacular coma en cada edicion, damb es esportistes d’elit ena zòna de dauant damb fòrça ganes de pujar a un pòdium qu’a estat fòrça disputat.

Ena categoria reina, era aranesa Marta Cester (CAEI), damb 1h.58m.41, e Sadurní Betriu (CEFUC), damb 1.39.59, s’an impausat damb autoritat. Andús an guanhat dejà diuèrsi viatges aguesta competicion e saben ara perfeccion coma dossificar-se en un traçat tant long entà arténher entrar es prumèri ena meta, a on les demorauen familhars e amics.

FOTOTUR

En hemnes era dusau en entrar per meta enes 42 km a estat Varvara Prokhorova (Bones Sport) damb 2.01.07, seguida per Irati Cuadrado (IRRTZ) damb 2.01.12. En òmes, Marc Alonso (CEFUC) a quedat dusau damb 1.42.36, e tresau damb 1.43.14 a entrat Roberto Piqueras (EMEM).

Era victòria des 21 km a estat tà Martina Miquel (CENA) damb 1.18.13 e Marc Colell (CEFUC) damb 1.03.48. Ena distància mès cuerta, es 10 km, an artenhut er aur Romane Cordonnier (MONTAGNARDS ARGELESIENS PYRENE) damb 30:53 e Peio Añarbe (Montaña Gasteiz) damb 23.59.

FOTOTUR

Pera sua part, es campions e campiones d’Espanha d’Sprint de dissabte, en gran eveniment patrocinat per Salomon, sigueren en categoria absoluta Alaia Juaristi e Marc Colell. En U16 Martina Sellés e er aranés Pablo Moreno. En infantil U14 Joana Puig e Adrian Lanau. En U12 Queralt Arimon e Lorien Barrio. E en U10 Alba Mellen e Jep Grau!

Era Marxa Beret ei fòrça mès qu’ua competicion, ei ua des pròves d’esquí nordic mès consolidades que se realizen en país. Mes enlà des esportistes d’elit, era majoria des participants pertanhen a un public familhar e grops d’amics que se la prenen coma era hèsta der esquí de hons.

Aguest eveniment ei organizat peth Conselh Generau d’Aran, dera man de Baqueira Beret e eth Conselh Esportiu dera Val d’Aran. Compde damb era collaboracion dera Associacion Volentaris Val d’Aran, er Ajuntament de Vielha e Mijaran, Deputacion de Lhèida, Pompièrs d’Aran, Aran Salut, Mossos d’Esquadra, INS d’Aran, ath delà dera Reau Federacion Espanhòla Espòrts d’Iuèrn (RFEDI), era Federació Catalana d’Esports d’Hivern (FCEH) e es disparièrs patrocinadors.