Vielha, 26 d’abriu de 2018.- Entre es dies 18 e 20 d’abriu a agut lòc ua naua edicion deth Mastèr d’Atencion Pre-espitalària e Espitalària Urgenta MAPHU Presenciau IL-3 UB, en tot correspóner ath modul d’AMV (Atencion damb Multiples Victimes) e Atencion de Montanha ena Val d’Aran.

Eth Mastèr ei organizat peth Conselh Generau d’Aran en collaboracion damb era Universitat de Barcelona, Pompièrs e Emergéncies d’Aran e er Institut de Formacion Contunha de Catalonha. Es activitats deth Mastèr compden damb era collaboracion deth Servici Aranés de Benéster e Salut (SABS) e dera enterpresa Habock Aviation Group.

Eth MAPHU ei dirigit per Javier Colina, professor titular d’Infirmeria dera UB, e Fran  Cardeñes, director tecnic de Pompièrs e Emergéncies d’Aran, e coordinat per Juanmi Riu, Àlex Orna, Xavier Bernárdez e Fran Tébar.

Er objectiu deth Mastèr ei coordinar eth trabalh deth personau sanitari damb eth personau d’emergéncies, entà méter en situacion es accions d’uns e d’auti. Cau arrebrembar que mès deth 60% deth personau d’infirmeria deth SEM (Sistèma d’Emergéncies Medicaus dera Generalitat de Catalonha), an passat peth Mastèr d’Atencion Pre-espitalària e Espitalària Urgenta pendent toti aguesti darrèri ans.

Es estudiants deth Mastèr an artenhut coneishements sus materiau de montanha, maniòbres de seguretat damb elicoptèr, foncionament e estructura deth Grop de Rescat de Montanha, coneishements deth materiau de rescat d’iuèrn, rescat en lauegi, tractament en hipotermia, reanimacion de victimes enterrades e sessions d’abilitats ena atencion a multiples victimes, entre d’auti.

Es activitats s’an desvolopat es sessions de maitin e vrespada en disparièrs lòcs dera Val d’Aran.