Vielha, 29 d’abriu de 2016.- Deth 27 ath 30 d’abriu de 2016 organizat peth Conselh Generau d’Aran, en collaboracion damb era Universitat de Barcelona, Pompièrs d’Aran e er Institut de Formacion Contínua de Catalonha , s’an amiat a tèrme es activitats deth Mastèr en Atencion Preospitalària e Ospitalària Urgenta, corresponentes ath modul de AMV (Atencion damb Multiples Victimes) e Atencion de Montanha ena Val d’Aran.
Es activitats deth Mastèr, qu’a compdat damb era collaboracion deth Servici Aranés de Benèster e Salut (SABS) e dera enterpresa TAF Helicopters-Group Habbok, s’an desvolopat pendent es quate dies en sessions de maitin e tarde en desparièrs lòcs dera Val d’Aran.
Es alumnes deth Mastèr, an artenhut coneishences sobre materiau de montanha, manòbres de seguretat en elicoptèr, foncionament e estructura deth GRAE, coneishença deth materiau de rescat en iuèrn, rescat en lauegi, tractament en ipotermia, reanimacion de victimes enterrades, sessions d’abiletat en atencion a multiples victimes, entre d’auti.
Eth Mastèr ei dirigit per Javier Colina, professor titular d’Infermieria dera UB, e Fran Cardeñes, director tecnic de TESVA, e coordinat per Juanmi Riu, Alex Orna, Xavier Bernárdez e Fran Tébar.
Segontes expliquèc Javier Colina, eth Mastèr, ei eth continuament deth Postgrau que s’inicièc en 1992, que a compdar deth cors 1999-2000 s’incorporèc en eth, eth modul de Montanha que se realize ena Val d’Aran. Er objectiu ei coordinar eth trabalh deth personau sanitari damb eth personau d’emergéncies, entà méter en situacion es accions d’un e d’auti. Mès deth 60% deth personau d’infermieria deth SEM (Sistèma d’Emergéncies Medicaus dera Generalitat de Catalonha), an passat peth Mastèr en Atencion Preospitalària e Ospitalària Urgenta pendent toti aguesti ans.
