Destaque er increment deth 26’3% ena recuelhuda d’envasi e plastic enquia fin de noveme

Vielha, 14 de deseme de 2018.- Ara demora de barrar er an damb es chifres definitives deth mes de deseme, es resultats deth servici dera recuelhuda, transpòrt e tractament des residus municipaus ena Val d’Aran a fin deth mes de noveme apòrten conclusions positives.

Des quantitats de residus arrecuelhudes selectivaments pes 5 fraccions tractades (envasi, papèr e carton, veire, rèsta e organic) resulte un increment de recuelhuda de papèr e carton en un 13’31% mès qu’er an 2017; de veire en un 6’18%; d’envasi en un 26’3%; mentres que era recuelhuda de residus organics sonque a incrementat un 23% e era rèsta un 2%.

Eth conselhèr de Territòri d’Aran, José Antonio Boya, a avalorat positivaments aguestes chifres, encara qu’a dit que non cau baishar era guardia, donques qu’es resultats encara son per jos es objectius mercadi peth Conselh Generau d’Aran. José Antonio Boya, a arregraït era collaboracion e er esfòrç des ciutadans que cada viatge prenen mès consciéncia dera importància de suenhar er entorn, valor de principau importància en cas dera Val de Aran, entath desvolopament sostenible e equilibrat des desparières activitats economiques que s’amien a tèrme e sustot dera activitat toristica coma principau activitat economica dera Val d’Aran. En aguest sentit, eth conselhèr de Territòri d’Aran destaquèc era evolucion positiva des darrèri ans e a hèt mencion ar esfòrç que s’a amiat a tèrme des deth pròpri Conselh Generau d’Aran.

Boya, a soslinhat qu’era entrada en foncionament deth centre de recuelhuda de residus de Bèusa en Vielha e Mijaran e es melhores en çò que tanh ara gestion de residus enes auti dus punts de recuelhuda dera Val d’Aran, en Baish e Naut Aran, an contribuït de manèra fòrça importanta ena obtencion de resultats. José Antonio Boya, a arrebrembat qu’eth servici de recuelhuda en aguesti tres punts ei gratuït entàs particulars e a animat ara ciutadania a contunhar en tot utilizar aguesti servicis.

En referéncia as accions enes centres de recuelhuda de residus ena Val d’Aran, ath delà dera entrada en foncionament deth centre de recuelhuda de residus de Bèusa, eth conselhèr de Territòri d’Aran a soslinhat qu’en cas deth centre de classament de residus de Baqueira, eth Govèrn d’Aran e er Ajuntament de Naut Aran invertiran un totau de 75.000 € enguan 2018.