• Eth Conselh Generau d’Aran a compartit damb es sòcis de Foment Torisme Val d’Aran aguesta Memòria, que remasse totes es accions amiades a tèrme pendent er an passat, orientades a dinamizar eth sector ostelèr, era restauracion e eth comèrç, força condicionadi pera crisi sanitària e socioeconomica dera COVID-19

Eth plan d’actuacion de Foment Torisme Val d’Aran se vedec en 2020 fòrça condicionat pera crisi sanitària e socioeconomica dera COVID-19. Aguesta situacion, portèc ath Conselh Generau d’Aran a reorientar es sues estrategies e es accions a implementar, en base ara naua realitat, totes eres fonamentades en tres èishi: era sostenibilitat, era cooperacion e era innovacion.

“Fòrça des actuacions desvolopades er an passat non èren contemplades en Plan d’Accions iniciau, mès era situacion viscuda mos possèc a reinventar-mos entà poder aufrir es melhors experiéncies possibles as nòsti visitants”, afirmaue eth vicesindic e conselhèr d’Economia, Torisme e Promocion Economica, Juan Antonio Serrano.

En aguest sens, eth tanben conselhèr d’Economia, Torisme e Promocion Economia, Josep Canut higie que: “deth govèn deth Conselh Generau d’Aran ençà, em convençudi que, maugrat es adversitats, aguest 2021 poderam seguir trabalhant de forma coordinada entà minimizar er impacte economic sus eth sector toristic e entre toti reforçar era imatge deth nòste territòri”.

Pendent 2020 s’amièren a tèrme tot un seguit de campanhes orientades a dinamizar e promocionar eth sector ostelèr, era restauracion e eth comèrç deth territòri.

Cau destacar iniciatives coma Mercats d’Aran, un mercat itinerant que s’amièc a tèrme pendent eth mes d’agost enes pòbles de Salardú, Arties, Vielha, Bossòst e Les e que compdèc damb era participacion d’un totau de 23 empreses entre comèrci, productors dera Marca de Garantia e artesans locaus; Cornèrs d’Aran, un nau servici de rotes guidades pes pòbles e entorns mès emblematics d’Aran, en tot aufrir as uatgèrs e usatgères un itinerari pera cultura e istòria aranesa; eth Mes deth benèster, peth que s’aufric ua grana aufèrta d’activitats coma iòga, meditacion, dança, talhèrs de codina saludabla…

En totau, s’an metut en marcha mès d’ua quinzea de campanhes dirigides autant ath public locau coma as visitants, totes eres adaptades ara pandèmia e es mesures e restriccions vigents.

S’amièren a tèrme tanben accions de comunicacion online e promocion en diuèrsi mieis de premsa escrita, digitau, television e radio. Totun, es accions de promocion deth destin en fires o salons toristics, atau coma presentacions e press trips se vederen redusits pr’amor des restriccions de mobilitat e aforament.

Pendent er an passat, 73.734 persones visitèren es Oficines de Torisme e punts d’informacion dera Val d’Aran. D’eres, eth 89,61% procedien der Estat espanhòu e un 10,39% èren de procedéncia internacionau.

En çò que hè ath torisme nacionau, se produsic un aument deth torisme catalan, que representèc eth 69,41%, seguit dera Comunitat Valenciana (9,5%), Madrid (7,10%) e País Basc (6,18%). En torisme internacionau destaquèc, coma tostemp, eth naut percentatge de visitants francesi (84,34%).

Consulta aciu era Memòria: Memòria Plan Accions FTVA 2020_ aranes