Un solei permanent e ua nhèu esplendida en Beret arreceberen ar esquiador, Pol Carreras, que tornèc des JJOO de Sochi hè pòqui dies e non volec perder-se era unica carrèra en Espanha que da bèques d’estudis as melhors esquiadors. Tanpòc manquèc, Ona Rocamora, qu’en acabar era carrèra expliquèc que “damb era bèca de 2.000€ è pagada ja era matricula e part deth cors der an que ven”.
Eth Trofèu Fondacion Jesús Serra ei ua hèsta der espòrt d’iuèrn que congreguèc en Beret a 150 inscriti es dus dies de competicions. Eth dissabte se disputèc un gigant classificatori entath parallel deth dimenge a on solament i son es 32 melhors òmes e es 16 hemnes damb es cronos mès rapids. Era carrèra deth dissabte ère open e participèren infantils, júniors, sèniors e veterani ath delà des corredors d’elèit que se bateren eth dimenge pes bèques. Ei donques ua hèsta a on i a grana quantitat d’ex corredors que se mesuren damb es mès joeni en tot crear un ambient fòrça especiau. Ath delà i a multitud de prèmis e regals entàs participants.
Ona Rocamora, imbatible
En parallel, a on se hè concurréncia un contra un en traçats identics, demostrèc pendent es eliminatòries deth dimenge e enquiara sua victòria finau qu’ei en fòrça bona forma. Era esquiadora de Sort eliminèc a contrincants dera talha de Laura Jardí en tot protagonizar uns düèls destacables. Era finau afrontèc a Rocamora contra Lucía Guerra que non podec superar ara catalana. Dempús de pujar ath mès naut deth pòdi Rocamora, en tot estudiar d’engenharia, destaquèc qu’iniciatiues coma aguesta son fòrça de besonh entàs esquiadors espanhòus en un moment eth qué ei malaisit sufragar estudis e carrèra esportiua.
Cau destacar tanben eth düèl entath tresau e quatau lòc que protagonizèren es esquiadores Ares Rafel e Gini Vidaurreta en eth quau s’imposèc Rafel. Vidaurreta, era veterana qu’arribèc mès luenh en parallel, hec concurréncia a un naut nivèu en tot méter reauments malaisit era carrèra as esquiadores joenes e encara en actiu.
Pol Carreras, era revenja der olimpic
Damb cara de satisfaccion er esquiador barcelonés e estudiant de dret afirmaue auer-se trèt ua espia en tot guanhar a Xavier Salarich ena finau. Eth motiu: Salarich s’imposèc a Carreras est an passat en tot arrancar-li era bèca mès preuada. Es ajudes as esportistes menors de 25 ans, tant òmes coma hemnes, son de 2.000€, 1.500€ e 1.000€ de prumèr a tresau. Er esquiador olimpic ère en ua forma excepcionau e atau ac demostrèc en tot imposar-se a Salarich que tot e desplegar eth sòn portentós fisic non podec damb un Carreras ultra motivat.
En baishar deth pòdi er especialista en eslalom e gigant declaraue qu’ “a pesar qu’es resultats no m’an acompanhat en Sochi, è tornat fòrça motivat entà afrontar es pròplèus quate ans de preparacion entàs JJOO d’iuèrn e era bèca d’aué ei ua ajuda fòrça benvenguda en aguest long camin”.
Eth tresau en pòdi siguec Toni Portas que vencec a Oriol Colomer dempús qu’aguest darrèr queiguesse en ua des manges dera finau de consolacion.
Jesús Serra, fondador de Baqueira e apassionat dera Val d’Aran
Laura Halpern Serra, directora dera Fondacion, afirmèc qu’enguan a estat un aunor auer a un olimpic en tot hèr concurréncia, en referéncia a Carreras, e reïterèc que cada edicion constate eth gran nivèu des competidors deth parallel e eth bon ambient regnant. Halpern arrebrembèc qu’eth gigant deth dissabte ei ua carrèra dubèrta e destaquèc era sana barreja en aguest traçat des aficionats d’esquí toristic damb es esportistes deth mès naut nivèu.
Jesús Serra Santamans, pair-sénher d’Halpern, siguec impulsor e fondador de Baqueira Beret e segons era directora dera fondacion, era competicion que pòrte eth sòn nòm resumissen es sues tres granes passions: era Val d’Aran, er esquí e era formacion.
Mès informacion en: http://www.baqueira.es/tjs