• Ager se barrèren es inscripcions on-line entara Marxa Beret d’enguan que se celebrarà aguest dimenge 5 de hereuèr. Eth 30% des inscrits son estrangèrs, principauments des païsi nordics.
Aguesta dimenjada, 4 e 5 de hereuèr, era estacion aranesa, Baqueira Beret, acuelherà era 38au Marxa Beret que seguís en calendari deth Circuit de Longues Distàncies Populares dera Federacion Internacionau d’Esquí (ML) dera Federacion internacionau d’Esquí (FIS) e per prumèr còp a entrat a formar part dera Copa Espanha deth calendari dera Reiau Federacion Espanhòla Espòrts d’Iuèrn (RFEDI).
Ager dijaus, 2 de hereuèr, se barrèren es inscripcions on-line damb mès de 700 corredors inscrits a on eth 30% son estrangèrs, era majoria procedenti des païsi nordics. Enguan se demore arribar ara chifra des 1200 hondistes coma era passada sason quan era Marxa siguec Campionat Europèu de Maratons d’esquí de hons Euroloppet.
Enguan, era Marxa vò assolidar aguest eveniment entà esportistes de naut nivèu, mès tanben populars, tant nacionaus coma europèus, e tanben entà familhes que vòlen gaudir d’aguesta hèsta der esquí de hons pr’amor que tanben i an inscripcions sense licéncia de corredor.
En paraules dera conselhèra de Torisme e Desvolopament Economic d’Aran; Anna Díaz: “Era Marxa Beret mos ajude a internacionalizar eth torisme e promò d’autes disciplines des espòrts de nhèu”.
Foto: Volentaris d’Aran
Pera sua part, eth vicesindic d’Aran e director dera Marxa Beret, Luis Carlos Medina, a soslinhat eth trabalh de toti es collaboradors que hèn possible era Marxa Beret e en especiau as Volontaris d’Aran, ar IES d’Aran, qu’apòrte alumnes des cicles formatius entàs contraròls tecnics deth circuit e Era Escòla.
Es esportistes de mès nivèu que seràn presents, ena categoria U18, Paula Martínez (CENA) e Gral Sellés (Club Bellver) e, ena categoria U16, era aranesa, Maria Iglesias (ANEC) e Maria Sellés, (Club Bellver). Toti eri deth programa FutuRFEDI entath desvolopament dera tecnificacion des esportistes mès joeni amassa damb es federacions territoriaus e es sòns clubs.
Eth dissabte 4 de hereuèr, as 16:00 ores, se celebrarà era pròva de skating Sprint Salomon ena zòna deth parcatge dera C-28 en Arties coma pròva d’exibicion a on se demore un traçat damb fòrça sorpreses e emocions.
Dimenge 5 de hereuèr se disputarà era 38au Marxa Beret, damb un circuit de 10 km ena zòna de Beret e Orri; eth de 21 km ena zòna de Beret, Orri e Montgarri e fin finau eth circuit de 42 km era zòna Beret, Orri, Montgarri e direccion Marimanha gràcies ara quantitat de nhèu que dispause era estacion.
Era Marxa Beret ei ua des pròves d’esquí nordic mès assolidades que se realizen en territòri nacionau, e cada an compde damb un nombrós numerò de participants que non se vòlen pèrder era cita. Damb un Plan de Beret entièraments blanc gràcies as intenses nheuades qu’ac corbissen.
Era Marxa Beret ei organizada peth Conselh Generau d’Aran, Baqueira Beret e er ajuntament de Naut Aran. Compde damb era collaboracion de: Associacion Volentaris d’Aran, Foment Torisme Val d’Aran, Deputacion de Lhèida, Pompièrs d’Aran, Aran Salut, Mossos d’Esquadra, INS d’Aran, ath delà dera Reiau Federacion Espanhòla Espòrts d’Iuèrn (RFEDI), era Federacion Catalana d’Espòrts d’Iuèrn (FCEH) e es diferenti patrocinadors.
Entà assolidar-la coma era grana hèsta der esquí nordic, eth Conselh e Baqueira Beret an prepausat ua sèria d’activitats paralleles ara Marxa Beret entà que toti es participants gaudisquen d’ua agradiua e complèta dimenjada.
• Programa dera dimenjada
Dissabte, 4 hereuèr 2017:
Se celebrarà ua demostracion ena modalitat liura (patinador) der espectacular Sprint Salomon. Aguesta pròva, que se desvoloparà ena poblacion d’Arties damb ua distància de 1,5 quilomètres, aurà era gessuda tàs 16:00 ores.
Era participacion serà limitada a 32 òmes e 16 hemnes. Eth despartiment de prèmis se harà eth madeish dissabte ena casa d’Acuelhuda entàs 19:00 ores, abans dera presentacion dera 38au Marxa Beret.
Dimenge, 5 hereuèr 2017:
38au Marxa Beret a compdar des 10:00 ores deth maitin. Se realizarà en Plan de Beret, es traçats de 42, 21 e 10 Km damb ua gessuda simultània. Unicaments se permeterà era tecnica classica. Poderàn participar enes dues distàncies longues es òmes e hemnes neishudi er an 1999 e anteriors. Era pròva de 10 km se considère promocionau e ei daurida a toti. Tàs 13:30 ores se realizarà eth despartiment de prèmis en madeish circuit damb era cerimònia de clausura tàs 14:00 ores.
Inscripcions presenciaus
En persona en Pòliesportiu de Salardú (Casa d’Acuelhuda) eth dissabte, 4 de hereuèr, a on ath delà s’aurà de presentar era documentacion corresponenta e recuélher eth dorsau e es obsequis.
Mès informacion: www.marxaberet.com
Vielha, 3 de hereuèr de 2017
Conselh Generau d’Aran: Núria Sanjuan