Mès de cent alcaldes s’amassen en Aran entà escotar era prepausa deth Comitat Olimpic Espanhòl

Eth Palai d’Espòrts de Vielha a acuelhut aué un acte impulsat peth Conselh Generau d’Aran dera man des des presidéncies des deputacions de Huesca, Zaragoza, Barcelona e Girona, presidéncies des comarques Ribagorza, Alto Gállego, Jacetania e Sobrarbe e Conselhs Comarcaus dera Alta Ribagorça, Pallars Jussà e Pallars Sobirà, Alt Urgell e Cerdanya, en quau eth president deth Comitat Olimpic Espanhòl (COE), Alejandro Blanco, a aufrit era conferéncia “Er olimpisme coma motor de desvolopament territoriau” e tath qu’an assistit mès de 150 persones
Pendent era sua intervencion, era sindica d’Aran a destacat era importància qu’aurie entath Pirinèu era celebracion d’uns Jòcs Olimpics d’iuèrn en 2030, qu’ajudarien ath territòri a projectar-se e demostrar era sua capacitat entà innovar e melhorar era qualitat de vida des persones que i viuen, a trauès der equilibri territoriau, dera sostenibilitat e dera igualtat d’oportunitats

Eth Palai d’Espòrts de Vielha a acuelhut aué un acte impulsat peth Conselh Generau d’Aran dera man des des presidéncies des deputacions de Huesca, Zaragoza, Barcelona e Girona, presidéncies des comarques Ribagorza, Alto Gállego, Jacetania e Sobrarbe e Conselhs Comarcaus dera Alta Ribagorça, Pallars Jussà e Pallars Sobirà, Alt Urgell e Cerdanya, en quau eth president deth Comitat Olimpic Espanhòl (COE), Alejandro Blanco, a aufrit era conferéncia “Er olimpisme coma motor de desvolopament territoriau”.

“Era celebracion, per prumèr viatge ena istòria, d’uns jòcs olimpics en Pirenèu ei ua hita plan importanta tad aguest territòri en generau e tara Val d’Aran en particular”, asseguraue era sindica d’Aran, Maria Vergés, en tot híger que: “ua oportunitat d’aguestes dimensions a d’ajudar a generar er impuls en desvolopament sociau e territoriau qu’eth Pirenèu a de besonh entà projectar-se coma un territòri de referéncia e demostrar atau era nòsta capacitat, non sonque entà organizar eveniments d’aguestes caracteristiques, senon, tanben, era nòsta capacitat entà innovar e melhorar era qualitat de vida des persones que viuen aciu, a trauès der equilibri territoriau, dera sostenibilitat e dera igualtat d’oportunitats, ath delà de posicionar-mos internacionaument coma un territòri de referéncia”.

En aguest sens cau rebrembar qu’eth Conselh Generau d’Aran se convertic eth passat mes de seteme ena prumèra institucion en aprovar en plen, per unanimitat, ua declaracion institucionau en favor dera candidatura olimpica des Pirenèus tàs jòcs d’iuèrn de 2030.

Pendent era sua intervencion, era sindica d’Aran a insistit en “besonh de plantejar un enfocament estrategic des rèptes deth territòri e d’anar mès enlà unicament deth debat ambientau e toristic, un debar, er ambientau, qu’enquia ara arrés auie plantejat ne mostrat preocupacion, quan, per exemple, eth nòste territòri patís eth pas de centenats de camions diaris”. Era sindica soslinhaue tanben “en aguest procés, eth Conselh Generau d’Aran vò èster ua institucion activa entà arténher era hita d’aguesta candidatura, conscients coma èm der impacte positiu, atau coma passèc damb es JJOO de Barcelona 92, e ac volem hèr amassa damb era rèsta de territòris deth Pirenèu”.

Pendent era sua intervencion, era sindica a volut hèr un reconeishement as sies esportistes aranesi qu’an participat ath long dera istòria en uns jòcs olimpics d’iuèrn: Rafael Mombiedro en Oslo 1952, José Moga e Andreu Ribera en Cortina d’Ampezzo en 1956, Eva Moga en Calgary 1988, Xavi Ubeira en Albertville 1992 e Lillehammer 1994 e, eth mès recent, Alex Puente en Sochi 2014.

“Pensi qu’ei de justicia arregraïr eth trabalh e er esfòrç qu’aguesti esportistes an amiat a tèrme, non sonque elevant er esquí en Aran, en Catalunya e en tota España, senon tanben per auer representat era nòsta tèrra en uns JJOO, quauquarren qu’ei de besonh reconéisher coma meriten”, asseguraue Vergés, qui a volut arregraïr tanben eth sòn prètzhèt a toti e totes es esportistes qu’ena actualitat represènten ara Val d’Aran en modalitats coma eth freeride, er esquí aupin, esquí de hons, patinatge artistic o curling, entre fòrça d’auti.

Ena sua intervencion, eth president deth COE, Alejandro Blanco, a amiat a tèrme ua exposcion de çò que supause entath territòri acuélhere uns Jòcs Olimpics e dera gran repercussion mediatica qu’es madeishi an. A arregraït ara sindica era sua acuelhuda e a destacat qu’aguesta candidatura “ei era candidatura der entenement, eth dialòg e eth respècte, ena qu’era societat, es persones, an d’èster es responsables deth projècte, pr’amor qu’aguesta ei era nòsta candidatura” e higie que: “eth Pirenèu a de mostrar çò qu’èi, çò qu’ei capable d’arténher, era passion que sentís era sua gent pera nhèu, era montanha, er espòrt d’iuèrn, atau coma era capacitat, coneishement e implicacion des pirenencs e pirenenques”.