Vielha, 12 d’abriu de 2017.- Ager dimars 11 d’abriu ara edat de 93 ans, moric D. Melquiades Calzado de Castro, aranés adoptiu e illustre d’Aran.

Melquiades Calzado arrecebec de mans deth sindic d’Aran Carlos Barrera, era Midalha d’Aur deth Conselh Generau d’Aran eth 26 de deseme de 2013. Era Midalha d’Aur deth Conselh Generau d’Aran, ei era maximala distincion aunorifica qu’autrege eth Govèrn d’Aran en reconeishement a persones e collectius que damb es sues aportacions an prestat servicis considerables ena Val d’Aran.

Licenciat en Dret pera Universitat de Barcelona e Istoriador, D. Melquiades Calzado siguec vesin de Les des de que en an 1947 realizèc es milícies universitàries en Bossòst, Bausen e eth Portilhon.

Enamorat dera Val d’Aran comencèc es sues investigacions dera istòria aranesa des de mejans deth sègle darrèr, en tot arténher crear eth “Archiu Calzado”, plaçat ena Bibliotèca de Les, damb mès de 500 volums restacadi damb Aran.

Era sua passion pera istòria, li portèc a collaborar en diuèrses revistes coma TotAran e Aran Nau, ath delà de publicar nombrosi libres e trabalhs monografics sus aspèctes istorics e juridics dera Val d’Aran.

Eth sindic d’Aran Carlos Barrera e eth Plen deth Conselh Generau d’Aran, exprèssen es sues condolences ara familha e amassadi pera pèrta de tan illustre ciutadan.