S’a encetat en Aran era sason culturau d‘ostiu 2014. Entre eth 14 de juriòl e eth 14 de seteme, coma cada an, eth visitaire poderà apropar-se entà gaudir e conéisher quauqu’uns des petiti cornèrs deth nòste passat qu’an devengut part dera nòsta istòria. Pendent aguest periòde se poirà visitar eth Musèu dera Val d’Aran e era Fabrica dera lan en Vielha; er Ecomusèu Çò de Joanchiquet en Vilamòs; era sala d´exposicions temporaus plaçada ena glèisa de Sant Joan d´Arties; eth PyrenMuseu e era Mòla en Salardú, eth Musèu dera Nhèu en Unha; eth Musèu Eth Corrau en Bagergue e era Mina Victòria en Arres.

Per un aute costat, tanben era Rota Romanica d´Aran aufrís pendent aguest madeish periòde, era possibilitat de conéisher eth ric patrimòni artistic que sauven es glèises de Santa Maria d´Arties, Sant Andrèu de Salardú, Santa Maria de Cap d´Aran de Tredòs, Santa Eulària d´Unha e Sant Fèlix de Vilac a trauès d’un servici de visites guidades, tamb oraris determinats. Tanben ei possible visitar d’autes glèises de notable interès culturau, coma Era Mair de Diu dera Purificacion de Bossòst, Sant Miquèu de Vielha, Santa Maria de Vilamòs, Sant Fèlix de Bagergue e Sant Blas e Sant Joan en Les, que seràn dubèrtes sense servici de guida.

Enguan, damb mès fòrça que jamès, èm disposadi a dar a conéisher e hèr a gaudir ath visitaire d´aguest ric patrimòni culturau e naturau qu´ei era Val d´Aran.