• Agents de Miei Ambient del Conselh Generau d’Aran an constatat un atac d’os a ua oelha en municipi de Naut Aran.

• Eth tecnic de supòrt ramadèr deth Conselh Generaiu d’Aran realize es actoacions de besonh entà balhar supòrt ath ramadèr afectat per aguest ahèr.

Eth passat deluns 27 de Mai, es Agent de Miei Ambient deth Conselh Generau d’Aran an constatat un atac d’os a ua oelha en municipi de Naut Aran.

Er atac se produsic laguens d’un barratge en eth quau ja s’i auie constatat un aute atac ans en darrèr.

En aguesti darrèri ans es atacs a bestiar ovin e crabun passen ena primauèra abantes der agrupament des ramats en tot amendrir ena sason d’ostiu quan es animaus se trapen en nauta montanha.

Pendent eth día d’aué s’enviaràn a analizar es mòstres recuelhudes der atac ara Universitat Autonoma de Barcelona, a on se sajarà d’identificar ar os responsable d’aguest atac.

Atau madeish eth tecnic de supòrt ramadèr deth Conselh Generau d’Aran se desplaçarà enquiara zòna der atac, entà amassar-se damb eth ramadèr e hèr eth contraròlte deth ramat entà poder identificar ar animau subjècte der atac e balhar eth supòrt de besonh ath ramadèr.

Vielha, 29 de mai de 2024