• Un totau de 5 glèises mostraràn eth sòn patrimòni, damb projeccions comentades per ua istoriana, seguit d’un concèrt de musica classica

• 5 formacions de concertistes ampliràn de musica classica cada ua des glèises escuelhudes tath present cicle Romanic Musicau

Eth Conselh Generau d’Aran e Foment Torisme Val d’Aran, damb era collaboracion der Archiprestat dera Val d’Aran, organizen era 21au edicion deth cicle de visites e concèrt Romanic Musicau.

Damb aguestes visites nocturnes as glèises araneses e eth posterior concèrt non sonque se met en valor eth territòri, senon tanben era aufèrta d’activitats ludico-culturaus.

Romanic Musicau ei ua activitat qu’arribe ara sua 21au edicion damb naues istòries sus es monuments e damb grops musicaus que complementen era explicacion dera istoriana que, damb supòrt  d’imatges e indicacions dera madeisha glèisa, desvolòpe era istòria pendent eth transcors des ans. Ua contextualizacion dera bastissa que servís entà facilitar informacion sus eth pas deth temps e coma a afectat ath monument e eth sòn entorn. Vedem coma eth gotic e eth romanic se dan era man entà acabar ludent es pentures des murs, tets e objèctes que mos parlen dera forma de vida e eth sénter dera epòca.

Sant Andreu de Salardú eth 2 d’agost, Sant Blai de Les eth 9 d’agost, Santa Eulàlia d’Unha eth 16 d’agost, era Purificacion de Maria de Bossòst eth 23 d’agost e Sant Miquèu de Vielha eth 30 d’agost configuren era programacion deth cicle d’ostiu, que compde damb 16 musics que realizaràn concèrts de musica classica enes diferents glèises.

Un projècte que remasse diferent public, abitants dera Val d’Aran e toristes, que gaudissen d’un espaci unic laguens dera aufèrta culturau gratuïta qu’aufrissen eth Conselh e Foment Torisme Val d’Aran.