• Pr’amor dera favorable evolucion dera pandèmia en territòri, eth Conselh Generau d’Aran, d’acòrd damb es indicacions deth Departament de Salut dera Generalitat, a barrat aué eth punt de vacunacion massiva plaçat enquiara en centre de joenessa Antara de Vielha e, a compdar d’aguest moment, era vacunacion s’amiarà a tèrme ena unitat assistenciau COVID enes moduls exteriors der Espitau Val d’Aran, çò que permeterà ampliar es dies de vacunacion, en tot incorporar tanben es dimenjades

• Era sindica d’Aran a volut arregraïr ar Ajuntament de Vielha e Mijaran era sua collaboracion damb eth sistèma sanitari aranés, en tot facilitar era vacunacion contra eth virus cedint eth centre municipau de joenessa pendent aguesti darrèri mesi

Es servicis sanitaris deth Conselh Generau d’Aran an barrat aué, 1 d’octobre, eth punt de vacunacion massiva contra era COVID-19, plaçat enquiara en centre de joenessa Antara de Vielha. A compdar d’aguest moment, eth personau dera unitat assistenciau COVID-19 der Espitau Val d’Aran amiarà a tèrme era vacunacion enes moduls exteriors der espitau, çò que permeterà ampliar es dies de vacunacion, en tot incorporar tanben es dimenjades.

En aguest sens, era sindica d’Aran, Maria Vergés, a volut arregraïr nauament “eth compromís e er esfòrç des professionaus sanitaris d’Aran e des sòns responsables deuant d’aguesta pandèmia e deth procès de vacunacion, especiaument auent en compde que venguem de trauessar un darrèr an e miei fòrça complicat, qu’a tensionat eth nòste sistèma sanitari”, e a senhalat que: “ei important qu’era gent deth nòste territòri sigue conscient que, a despièch qu’es donades an melhorat fòrça, era vacuna ei era unica airina qu’auem entà arténher nauament era normalitat” e a volut animar “a totes aqueres persones qu’encara non ac an hèt, a vacunar-se”.

Eth nau orari de vacunacion passarà a èster de deluns a diuendres de 16:00 a 17:30 ores e es dissabtes, dimenjes e dies hestius de 10:00 a 11:30. Es persones qu’ac volguen pòden reservar cita a trauès dera web https://vacunacovid.catsalut.gencat.cat/, mès tanben se manten er accès sense cita en aguest madeish orari.

Era sindica a volut tanben arregraïr tanben ath consistòri de Vielha e Mijaran “auer cedit eth sòn centre de joenessa deth mes de hereuèr ençà entà poder amiar a tèrme era vacunacion”.