Vielha, 12 d’abriu de 2019.- Eth Conselh Generau d’Aran a aquerit ua naua ambulància entath Servici Integrau de Pompièrs e Emergéncies d’Aran. Se tracte d’un veïcul Volkswagen Transporter damb traccion integrau e cambiament automatic destinat a corbir prètzhèts d’ambulància non assistenciau de classa A2.

Er aquesiment dera ambulància ven motivat pera caducidad d’ua auta mès anciana donques qu’era vida utila d’aguest tipe de veïculs ei de 10 ans.

Era naua ambulància incorpòre un nau sistèma de transpòrt sanitari entà pacients qu’an de desplaçar-se enquia centres assistenciaus dehòra dera Val d’Aran entà realizar pròves diagnostiques complementàries o quauque tipe de tractament.

Era ambulància dispòse d’un sistèma de cagira pionèr en Espanha que permet desplaçar as pacients des deth punt de recuelhuda enquiara zòna der espitau a on s’age de realizar eth tractament sense besonh de cambiar de cagira. Se tracte d’ua cagira ergonomica e comòda que ja utilizen es ambulàncies en Alemanha e Àustria, e qu’ei era prumèra d’aguestes caracteristiques en Espanha.

Eth Conselh Generau d’Aran a destinat 134.000 € ar aquesiment dera naua ambulància en tot pensar sustot ena comoditat des pacients ara ora de hèr longui desplaçaments des der Aran as centres assistenciaus de Lhèida, Barcelona o França.

Era naua ambulància aurà ua vida utila de 10 ans e entrarà en servici es pròplèus dies.