Es 76 empreses qu’an passat peth programa en 2015 an creat 142 naui lòcs de trabalh, e dues tresaus parts an artenhut aumentar eth sòn capitau.
Er objectiu deth “Pla Embarca” ei accelerar es ventes des companhies a trauès der assessorament per part de mentors e expèrts.
Enquiath 29 de hereuèr se pòden enviar es sollicituds entara 3au edicion.
Es 82% des start-ups qu’an participat ena edicion 2015 deth “Pla Embarca”, impulsat amassa per Catalonha Empren e ACCION, an aumentat eth sòn volum de negòci en un an. Participèren 76 empreses (start-up) damb 2 araneses: Arantec Enginheria e Naut Viajes .
Son donades de balanç dera dusau edicion deth “Pla Embarca”, ua iniciatiua que s’enquadre en programe Start-Up Catalonia e qu’a coma objectiu principau accelerar es ventes des empreses que i participen. Eth programa a 8 mesi de durada e ei dirigit a start-ups ena fasa iniciau qu’an un producte o servici innovador e un plan de creishement ambiciós.
Es 76 empreses dera darrèra edicion deth “Pla Embarca” an doblat en un periòde de 12 mèsi es chifres globaus d’exportacion e de finançament captat.
Es empreses seguissen ua estrategia de creishement enes acceleradores Start-up Catalonia plaçades en Baish Llobregat, ena Catalonha Centrau, ena Catalonha Sud, Girona, eth Maresme e Lhèida. Compden damb er assessorament d’un hilat de mentors e expèrts, atau coma sessions de networking entà facilitar es contactes professionaus damb er ecosistèma emprenedor.
90 naues empreses entara 3au edicion deth “Pla Embarca”
Era convocatòria entara tresau edicion deth “Pla Embarca”, daurida enquiath 29 de hereuèr, ei dirigida a 90 companhies de tota Catalonha. Es start-ups que siguen seleccionades iniciaràn eth programa eth pròplèu mes d’abriu enes diferentes acceleradores deth territòri.
Ei adreçat a:
– Empreses de, coma maximom, 5 ans de vida.
– Empreses damb un compausant innovador (ja sigue ath sòn modèl de negòci, producte, servici…).
– Empreses qu’agen, aumens, ua persona dedicada a temps complèt ath projècte.
Damb eth “Pla Embarca” poderàs:
Repensar era estrategia
– Quin ei eth nòste modèl de negòci?
– Auem ua estrategia comerciau eficienta?
– Auem estrategia financèra?
– Quin ei eth nòste avantatge competitiu?
Redefinir es equipes
– Auem era equipa adequada?
– Son toti en sòn lòc?
– Auem es competéncies adequades?
– Trabalham coma ua equipa?
Establir objectius
– Desvolopament d’abituds de planificacion estrategica
– Mesura de resultats
– Definicion d’indicadors e deteccion de naues oportunitats
Servicis
I a ua sèria de rèptes que tota empresa a d’arténher entà arribar a auer “èxit”, e que son es fondaments d’ua empresa entà créisher de manèra sostenible. E aguesti rèptes, son es que prepause arténher eth “Pla Embarca”:
– Compdar damb ua equipa organizada,
– Evitar errors ena gestion,
– Auer un modèl de negòci solid e contrastat en mercat,
– Profitar un hilat de contactes e damb experiéncia.
Metem a disposicion dera start-up:
– 40 ores de trabalh individuau damb un mentor, damb er objectiu de definir era estrategia e impulsar un plan de creishement a mesura
– Sessions (talhèrs, capacitacion,…) en territòri damb expèrts extèrnes e/o emprenedors a on se tracten es claus enes aspèctes de validacion, comercializacion, managment e finançament.
– Activitats de networking entà agranir era coneishença e eth hilat de contactes. A compdar de visites e amassades damb companhies catalanes de referéncia enquia sessions especializades damb expèrts.
Enquiath 29 de hereuèr se pòden enviar es sollicituds entara 3au edicion deth “Pla Embarca” en :
http://accio.gencat.cat/cat/estrategia-empresarial/start-ups/embarca/solicitud.jsp
Vielha, 8 de hereuèr de 2016
Conselh Generau d’Aran: Núria Sanjuan