Vielha, 10 de març de 2017.- Carla del Valle Lafuente ei era naua directora deth Musèu dera Val d’Aran, dempús d’auer superat eth procès public de seleccion de personau foncionari interin entà corbir era plaça de director/a de Musèu- dinamizador/a der auviatge culturau deth Conselh Generau d’Aran.

Carla del Valle Lafuente, ei Licenciada en Istòria der Art pera Universitat Autonòma de Barcelona (UAB) e mastèr degree pera Universitat de Múrcia. Abans d’accedir ath cargue de directora deth Musèu dera Val d’Aran, a trabalhat enes Musèus Municipaus de Sabadell, en Musèu Nacionau d’Art de Catalonha e coma assistent de direccion dera Galeriá Barbier.

Tanben ei autora entre uns auti de “Er encensèr romanic de Betren. Un exemple de patrimòni retrobat dehòra des nòstres termières”.

Eth Musèu dera Val d’Aran, actue coma sedença centrau a on damb ua presentacion dera Val d’Aran es visitants coneisheràn toti es elements que la intègren. Se convertís en ua autentica pòrta d’entrada entà descorbir eth país.

Era exposicion permanenta presente ua sintèsi dera istòria dera Val d’Aran, des dera preistòria enquias nòsti dies. S’expose ua interessanta colleccion d’objèctes arqueologics, artistics e etnografics.