• Era jornada gastronomica aurà lòc eth dijaus, 12 de març, e se poderà degustar era òlha aranesa, elaborada per Baqueira Beret

• Tanben se poderàn degustar diuèrsi productes dera Val d’Aran que hèn part dera denominacion Marca de Garantia

Foment Torisme Val d’Aran organize ua naua edicion dera hèsta gastronomica que pòrte per títol “Era Òlhada”, que consistís ena degustacion d’un des productes tipics dera Val d’Aran coma ei era òlha aranesa.

Deman dijaus, 12 de març, a compdar des 13h00, Baqueira Beret serà era encargada de codinar aguest plat, que poderà èster degustat per toti aqueri que crompen eth tiquet per valor de 3€ que se meteràn ara venta ath madeish moment en exterior dera cafeteria de Beret.

En madeish lòc, mentre se minge aguest plat, tanben se poderàn provar diferenti productes dera Val d’Aran includidi laguens dera Marca de Garantia. D’aguesta manèra, era jornada gastronomica supausarà ua grana oportunitat entà poder minjar diferenti productes deth territòri.

“Des de Foment Torisme Val d’Aran èm satisfèti de poder organizar ua naua edicion de “Era Òlhada”, que supause era melhor manèra de poder hèr conéisher era nòsta gastronomia a toti. En tot profitar er eveniment dera 62au Trobada Internacionau de Jornalistes (SCIJ) que se celèbre pendent aguesta setmana ena estacion de Baqueira Beret, tant es jornalistes coma era gent que mos visite poderàn degustar era òlha aranesa e d’auti productes locaus”, a comentat era conselhèra de Torisme, Comèrç e Consum d’Aran, Anna Díaz.