• Deth 28 de seteme ar 11 d’octobre, sies restaurants dera Val d’Aran aufriràn diferenti menús.
• Pendent dues setmanes se poderà gaudir des melhors recèptes dera codina tradicionau aranesa e dera innovacion qu’aufrissen es restaurants participants.

Un an mès, ena tardor se celèbre ua naua edicion dera Mòstra Gastronomica dera Codina Aranesa, damb era participacion de sies restaurants deth territòri, qu’aufriràn as sòns clients diferenti menús qu’includissen plats tipics dera Val d’Aran. Enguan, era Mòstra aurà lòc deth 28 de seteme ar 11 d’octobre.

Entad aguesta escadença, es restaurants participants seràn:

– Deth 28 de seteme ath 4 d’octobre: Era Coquèla (Vielha), Parador d’Arties (Arties) e Otèl Tuca (Vielha).

– Deth 5 ar 11 d’octobre: Era Mòla (Vielha ), Parador de Vielha (Vielha) e Unhòla (Bagergue).

Ath long des dues setmanes que dure era Mòstra, se poderàn degustar plats damb recèptes innovadores, enes que se codinaràn productes tradicionaus dera codina aranesa coma: Òlha aranesa, Civet, esturion, langoïssa e lit entre d’auti.

“Des deth Conselh Generau d’Aran apostam entà celebrar cada an era Mòstra Gastronomica dera Codina Aranesa, pr’amor qu’ei era melhor manèra qu’auem de mostrar ara gent un des elements mès importants dera cultura aranesa, coma ei era nòsta gastronomia”, comente era conselhèra de Torisme e Desvolopament Economic d’Aran, Anna Diaz, qu’a hijut “es restaurants participants aufriràn suggeridors menús elaboradi a compdar de recèptes tradicionaus”.

Es prètzi des menús que hèn part d’aguest eveniment gastronomic, oscillen entre es 29€ e es 35€. Es menús se serviràn es sèt dies dera setmana, en servici de minjar e sopar.

Mès informacion e menús: llibret mostra 2015