Vielha, 5 de març de 2019.- Desparièrs restaurants dera Val d’Aran aufriràn, deth 4 ath 24 de març plats preparadi damb Caviar Nacarii dera Val d’Aran.

Pendent eth Mes deth Caviar, aguesta jòia gastronomica des Pirenèus s’incorporarà as cartes d’onze arreconeishudi restaurants aranesi. Del gel al Foc (Rafael Hoteles), Café Nuevo, Era Coquèla, El Italiano (AC Baqueira Hoteles), Eth Ticolet, Es Arraïtzes, Wellbourne, Era Mòla, Lits, Borda Benjamin e El Molí de Vielha se repartiràn eth protagonisme ath long de tres setmanes.

Enes sòns menus seràn presents eth caviar e er esturion codinat en totes es sues versions coma eth Mijòu de ueu trufat damb crèma d’avocat, cigala e caviar Nacarii enquia plats mès contondenti coma er Esturion dera Val d’Aran codinat en desparières formes.

Coma en edicions anteriores es experiéncies culinàries pòden acompanhar-se d’autes activitats. Entre es quaus, visitar era factoria de Les entà conéisher era istòria e eth procès d’elaboracion, degustar caviar ena botiga deth centre de Vielha o immergir-se enes aigües deth balneari Termas Baronia de Les e conéisher es tractaments elaboradi damb caviar dera Val d’Aran.

Eth mes deth caviar ei organizat peth Conselh Generau d’Aran e Torisme Val d’Aran damb era collaboracion de Caviar Nacarii e eth Grèmi d’Ostalaria dera Val d’Aran.

Eth caviar aranés Nacarii, qu’a obtengut era reconeishença des codinèrs peth sòn sabor autentic e transparéncia, s’includís laguens dera Marca de Garantia Val d’Aran. Procedent des aigües heiredes, pures e cristallines deth desgèu deth Garona, eth caviar Nacarii, s’elabòre de manèra artesanau e damb metòdes tradicionaus ena piscifactoria plaçada en municipi de Les.

Se pòt descargar eth programa complèt deth Mes deth Caviar ací: http://www.visitvaldaran.com/wp-content/uploads/2019/03/llibret-setmana-deth-caviar-2019-2.pdf