Era donacion s’amiarà en Palai d’Espòrts de Vielha, des des 11 deth maitin enquias 10 dera net

Vielha, 7 de noveme de 2018.- Era Associacion de Donants de Sang dera Val d’Aran premanís entath pròplèu dissabte 10 de noveme era Maraton de donacion de sang en Palai d’Espòrts de Vielha.

Eth heired non ei un bon amic dera sang. Quan plòir e hè mau temps, es donacions quèn lèu enquiara mitat per ua major tendéncia a demorar-se en casa.

Entà qu’açò non arribe entara Val d’Aran s’organize aguesta naua maraton de donacions.

Era donacion non compòrte cap risc entath donant, e sonque demane ues menutes deth nòste temps. Era donacion s’amiarà en Palai d’Espòrts de Vielha, des des 11 deth maitin enquias 10 dera net .

Jornalièraments eth Banc de Sang distribuís uns 1.000 productes sanguini (plasma fresc, concentrat d’ematíes e concentradi de plaquetes) enes espitaus de Catalonha, sustot entà casi d’anèmia aguda o cronica, intervencions quirurgiques, tractaments oncologics e accidents grèus. Era sang e es sues compausantes an ua vida limitada e, per tant, entà assegurar un stock, ei de besonh qu’era donacion se convertisque en ua abitud. Ena Val d’Aran, gràcies ara collaboracion des sòns poblants, se torne ua costum entà pro gent donar sang enes dies de donacion.

Cau mantier es donacions entà poder aumentar e arribar a hèr front as besonhs deth dia a dia des espitaus e tanben a possibles situacions d’emergéncia. Era situacion aurie d’èster de resèrva entà 10 dies de toti es tipes de sang.

Era Maraton de donacion de sang compde damb era collaboracion deth Conselh Generau d’Aran, eth Departament de Salut dera Generalitat de Catalonha, eth Banc de sang e teishuts, e es ajuntaments de Vielha e Mijaran e Naut Aran.

Damb un còp non ei sufisent, vene a donar sang eth dissabte 10 de noveme!