• Damb aguest burèu se dinamizarà e promoirà eth torisme francés en Aran pendent tot er an.

Dijaus passat, 22 d’octobre, s’inaugurèc un nau burèu de Baqueira Beret e era Val d’Aran en Toulouse plaçada en num. 39au dera Rue du Pharaon.

Er objectiu principau ei dinamizar e promòir eth torisme francés pendent tot er an e en toti es mejans toristics.

Er encastre geografic deth cap-lòc de Midi-Pyrénées, damb 1,5 milions d’abitants, supause un mercat d’especiau interès, pera sua proximitat ara Val d’Aran.

Baqueira Beret compde damb un burèu en Burdeaux; damb aguesta dusau demorarà corbida era estrategia de promocion ena part sud e oèst de França, damb expectatives d’expansion cap ath nòrd.

Era inauguracion compdèc damb era preséncia dera conselhèra de Torisme e Desvolopament Economic d’Aran, Anna Díaz, deth president executiu de Baqueira Beret, Aureli Bisbe, deth director comerciau de Baqueira Beret, Xavi Ubeira, deth vicesindic 2au d’Aran e baile deth Naut Aran, César Ruiz-Canela e deth conselhèr de Territòri d’Aran, Jose A. Boya.

En paraules dera conselhèra, Anna Díaz, “damb aguest burèu trabalharam amassa entà promòir e dinamizar era Val d’Aran pendent tot er an e en toti es encastres toristics ath delà der iuèrn e dera activitat der esquí”.