Residents, proprietaris de dusaus residéncies e gent que pernocti en establiments toristics dera Val d’Aran, poderàn arrecuélher misharnons en es bòsqui sense cap còst.
Damb aguesta nòrma se preten regular er espoli e evitar damatges en bòsc.
En paraules deth sindic d’Aran, Carlos Barrera, “aguesta mesura non a càp afan recaptatori donques qu’ei totauments gratuïta, e tanpòc limite era quantitat de misharnons que se pòden arrecuélher, era quau causa òc preten eliminar as grops de gent de dehòra dera Val d’Aran que se dediquen unicaments ar espoli des bòsqui.”
Barrera ath delà a ahijut qu’ “aguesta regulacion vò garantir qu’es aranesi quan gesseràn ath bòsc tròben misharnons e, ath madeish temps, potenciar era Val d’Aran coma destinacion toristica.”
Eth Conselh Generau expedirà uns talonaris as sòns Ajuntaments e lotjaments otelèrs que permeterà a residents, proprietaris de dusaus residéncies e gent que pernocti en establiments toristics dera Val d’Aran, poder arrecuélher misharnons en es bòsqui sense cap còst.
Eth reglament, cossent damb era nòrma forestau catalana, aplicarà sancions que van des de leugèrs, grèus, enquia fòrça grèus en casi de reïncidéncia.
Eth conselhèr d’Agricultura, Ramaderia e Medi Ambient, José E. Arró, a informat qu’”es agents de Miei Ambient deth Conselh Generau d’Aran seràn es encargadi de garantir que se complisque era naua nòrma. En aguest sens ei previst ua reünion de coordinacion damb eth còs de Mossos d’Esquadra e Guardia Civil pr’amor qu’eth Conselh Generau informe sus aguesta regulacion e pogue compdar damb era sua collaboracion a efèctes de contraròtles de compliment dera madeisha.”
Eth Conselh a installat 42 panèls de senhalizacion en es pistes forestaus entà informar sus era proïbicion d’arrecuélher misharnons en aranés, catalan, castelhan e francés.
Pera sua banda, era conselhèra de Torisme, Comèrç e Consum, Anna Díaz, a informat que “des de Foment Torisme Val d’Aran auem enviat ua carta informativa sus era naua nòrma as establiments toristics/otelèrs. Es talonaris les auràn ara sua disposicion en es burèus de Torisme dera Val d’Aran a compdar deth pròplèu 4 de junh.”
“Se realizarà ua campanha informativa en sud de França e ath delà s’editaràn uns huelhetons informatius entàs establiments comerciaus dera Val d’Aran” a ahijut Díaz.