• Es servicis Assistenciaus Integrats d’Aran Salut estreen naues installacions plaçades enes baishi deth carrèr Arnals, ath deuant der Espitau Val d’Aran qu’an de servir entà alotjar eth servici d’atencion domiciliària, eth burèu de tramitacion sociau e es servicis sociaus d’atencion primària.

Es Servicis Assistenciaus Integrats d’Aran, deth Conselh Generau, vien d’estrear era naua sedença centrau plaçada en carrèr Arnals de Vielha, ath dauant der Espitau Val d’Aran, qu’acuelherà era atencion en entorn domiciliari, eth burèu de tramitacion sociau e es servicis sociaus d’atencion primària.

Era sindica d’Aran, Maria Vergés a soslinhat: “Daurim aguesta division assistenciau damb part des servicis qu’aufrim des d’Aran Salut, a trauès deth Conselh Generau d’Aran, entà apropar eth servici as persones e acabar de barrar aguest hub de servici d’atencion, un besonh imminent a conseqüéncia der aument de servicis assistenciaus enes darrèri tempsi, damb un espaci mès apropiat entàs besonhs de privacitat des usatgèrs e tanben des trabalhadors der airau”.

Maria Vergés a hijut: “Damb aguest nau espaci volem visibilizar toti es servicis qu’aufrim, des des mès arraïtzadi en temps as naui que s’an metut en servici enes darrèri tempsi, coma eth dera atencion domiciliària o es projèctes d’accion comunitària coma “Suenha-te” o “En Familha”, que diversifiquen fòrça mès era aufèrta ena linha d’ampliacion de cartèra de servicis ath delà de concentrar-les en un madeish endret”.

Tà M. Àngels Borràs, directora assistenciau d’Aran Salut:  “Aguesti espacis assistenciaus son tanben de besonh entà qu’es usatgèrs agen contacte dirècte damb es servicis d’atencion medicau per part des sanitaris der Espitau, ua realitat que cau auer fòrça en compde en un entorn qu’ei de proximitat”.

Entà M. Eugènia López, directora de Servicis Sociaus d’Aran Salut: “Ei de besonh restacar que ja hè temps que mos coordinam damb es professionaus de Salut, e era proximitat en espaci damb es servicis d’Atencion Primària mos facilite trebalhar damb mès qualitat”.

Era atencion as usatgèrs ei dubèrta ath public a compdar des 8 deth maitin, mens es dimèrcles.

Ath marge d’aguesta naua sedença, cau remercar qu’eth Conselh Generau d’Aran compde tanben damb servicis assistenciaus integradi er tot eth territòri d’Aran.

En Vielha,

Deluns e dimars: maitin e tarde

Dimèrcles: maitin

Les, Bausen e Canejan

Deluns: maitin e tarde

Dijaus: tarde.

Ajuntament Les – Espaci Assistenciau Integrat Les.

Bossòst, Es Bòrdes, Vilamòs e Arres de Jos

Dimars, maitin e dijaus, tarde.

Espaci Assistenciau Integrat Bossòst.

Arties

Dimèrcles, maitin e dijaus, tarde.

Espaci Assistenciau Integrat Arties.

Salardú

2n e 4au dimèrcles, maitin e dijaus, tarde en Espaci Assistenciau Integrat Salardú.

Remercar qu’es servicis d’atencion sociau entàs persones compden damb dues sedences mès:

Eth des Servicis pes drets, qu’amasse era Oficina de Joenessa, eth Servici pes drets des hemnes e persones LGTBIQ+, servici d’acuelhuda a persones migrades EVO-SEVAD e persones damb discapacitat.

D’un aute costat, er Espaci d’Atencion Infantila, juvenila e tàs sues familhes, qu’aubèrgue era Unitat d’Infància e Familhes, eth Centre de desvolopament  infantiu e atencion precòça e es programes Suenha-te, Audèth de Huec e En Familha.

Vielha, 08 de junhsèga 2024