Vielha, 27 de juriòl de 2017.- Er alpinista tarraconense Òscar Cadiach a coronat eth cim deth Broad Peak (8.047 mètros), e s’a convertit en prumèr catalan que corone es catorze ueit mil sense oxigèn. Cadiach a compdat damb eth supòrt de Torisme Val d’Aran en aguesta darrèra expedicion que li a permetut hèr istòria laguens der alpinisme catalan e mondiau.

As sòns 64 ans, Oscar Cadiach entre ena selecte lista de 20 alpinistes qu’an completat es 14×8.000 sense oxigèn. Non a estat facil coronar eth Broad Peak e a estat possible dempús de diuèrsi assagi a on es condicions meteorologiques non acompanhèren.

Eth programa ‘Pont de Mahoma’, de Tarragona Ràdio, des d’a on an seguit toti es passi d’Òscar Cadiach enquia entrar ena istòria, a estat er encargat de dar a conéisher era proesa der alpinista catalan.

En declaracions en madeish programa, era conselhèra de Torisme deth Govèrn d’Aran, Anna Díaz, s’a mostrat fòrça contenta per auer pogut contribuïr ar èxit assolit per Òscar Cadiach ath qu’a felicitat en nòm deth Conselh Generau d’Aran. Díaz expliquèc que quan Cadiach torne de Pakistan, ua des prumères causes que harà serà visitar era Val d’Aran.

Entara ascension finau, Cadiach ère acompanhat des alpinistes Mohammed Ali ‘Sadpara’, eth turc Tunc Findik, mès dus americans, un polonés e ua chinesa.

En 2016, er alpinista arrecebec era Creu de Sant Jordi pera sua “excelléncia esportiua”. Entre es sòns grans èxits ei tanben eth d’èster eth prumèr catalan en coronar er Everest damb Antoni Sors e Carles Vallès en 1985 pera cara nòrd e sense oxigèn artificiau.