• Sitzer, sauvèc era vida as 5 ans en tot escapar der Olocaust nazi (1942) dempús de trauessar es Pirenèus des de França enquià Les.

• Paquita Sitzer, acompanhada peth vicesindic d’Aran, Luis Carlos Medina, visitèc es espacis expositius de Vielha e de Les deth projècte “Perseguidi e Sauvadi”.

En octobre deth 1942, era familha Bielinsky, artenhec arribar en pòble de Les a pè des de França, dempús de trauessar es montanhes. Ère ua familha judiua, d’origina polonesa, integrada pera parelha e es sòns dus hilhs, un mainatge e ua mainada. Maugrat qu’ath principi era policia termierèra pretenie retornar-les tà França pr’amor que non portauen era documentacion en regla, era pression des vesins de Les evitèc era sua deportacion e les facilitèc contunhar eth viatge enquià poder embarcar en pòrt de Vigo destinacion a Venezuela, a on reheren era sua vida. En Les, era hilha petita, Françoise Bielinsky, que sonque auie cinc ans, siguec inscrita damb eth diminutiu familhar de Paquita, nòm damb eth qué, d’alavetz ençà, a estat coneishuda. Ans dempús, ja en Venezuela, Paquita se maridèc en tot adoptar eth cognòm Sitzer. Es investigacions der istorian Josep Calvet, permeteren era localizacion de Paquita Sitzer en Venezuela qui en ostiu deth 2012 visitèc eth pòble de Les.

Ager, dimars 17 de noveme, Paquita Sitzer, retornèc ara Val d’Aran entà visitar en Vielha e en Les es espacis expositius, integradi en projècte “Perseguidi e Sauvadi”, promoigut pera Deputacion de Lhèida, que hè conéisher es rotes d’evasion que, laguens des Pirenèus de Lhèida seguiren totes aqueres persones qu’escapauen der Olocaust nazi.