• Aué non s’aconselhe realizar activitats de nauta montanha o limitar es nòstes gessudes.

Informacion facilitada peth Centre de Lauegi d’Aran: 

Aué non se recomane hèr activitat de nauta montanha. I a acumulacions de nhèu naua mobilizable ath torn de 100 cm e apròp des tucs es acumulacions de nhèu son majors per efècte deth vent deth nòrd. Demoram que i age activitat de lauegi de mesura mejana que pòden arribar as hons de val. Eth perilh accidentau se manten fòrça naut e en quinsevolh orientacion e poden desacadiar plaques des que mos serà fòrça complicat escapar e damb capacitat d’enterrar-mos en terren dubèrt. Limitam es gessudes per zònes boscades e pendents de mens de 30 grads.

Pendent es darrèri 3 dies a nheuat de forma contunhada e damb vent fòrt deth nòrd e nòrd-oèst. Aué demoram que i agen lauegi naturaus de mesura mejana damb amples cicatrius que pòden superar es 100 cm d’acumulacion e que damb facilitat arribaràn as hons dera val. Era pujada de temperatura prevista provocarà ua estructura invèrsa dera nhèu (mès pesada ena superfícia) qu’agravarà era inestabilitat. Enes còtes nautes e apròp des crestes es plaques de vent son fòrça espesses e se mantien tanben fòrça fragils.

Cau evitar hèr activitat per terren dubèrt, controtlar era acumulacion de nhèu eth tot moment e non trauessar vessants expausades damb possibla activitat naturau.

Estat dera nhèu

Eth “mantèl” ei continu per dessús es 1000 m damb acumulacions en 2200 m que se placen entre es 100 e 160 cm. Eth vent a provocat acumulacions qu’en lòcs favorables per dessús eth limit deth bòsc pòden superar es 200 cm de nhèu naua. Pendent eth maitin era nhèu que quèigue per jos es 1800-2000 m serà fòrça pesada e ac harà sus nivèus pòc cohesius e heireds. Per dessús des 2000 m, enes ombrèrs, i a nivèus fèbles (nhèu sucre) enterradi actius.

 Predictor: Jordi Gavaldà

Mès informacion: http://lauegi.conselharan.org/?lang=oc

Vielha, 16 de gèr de 2017

Conselh Generau d’Aran: Núria Sanjuan