Era estacion d’esquí nòrdic de Tuixent La Vansa acuelhec era IXI Marxa l’Arp e era 4au Micro Arp, dues competicions jos era tecnica classica.

Era 9au Copa Catalana d’esquí de hons e era 4au Copa Nins celebrèren era Marxa l’Arp e era Micro Arp, competicions qu’aguesta sason an complit 19 e 4 edicions, respectivaments. Per çò qu’ei dera Marxa l’Arp, se disputèc en dues distàncies; 21 quilomètres entà òmes e hemnes neishudes en an 1995 e anteriors e 12 quilomètres entà òmes e hemnes de totes es edats.

Per çò qu’ei des 21 quilomètres, eth prumèr classificat absolut en òmes siguec Ireneu Esteve, seguit de Sadurní Betriu deth CEFUC e de Bernat Galceran deth PEC. En hemnes, pugèc ath prumèr lòc deth pòdi, Mariona Aubert, seguida d’Aloma Combalia deth CENA e Laia Acero.

Ena distància des 12 quilomètres, es mès rapids sigueren er aranés, Pol Vidal der ANEC en òmes e Carola Vila deth CEFUC. Nil Martinez e Paula Martinez deth CENA arribèren dusaus, ath temps que Gral Selles deth Bellver e era aranesa, Marta Céster, der ANEC ac heren en tresau lòc.

En cas dera Micro Arp, es mainatges e mainades dera categoria Infantil 2 participèren ena pròva des 5 quilomètres. Es mès rapids sigueren Cesc Collel deth CEFUC en òmes e era aranesa, Maria Iglesias, der ANEC es hemnes, seguidi des segons classificadi que sigueren Jaume Pueyo deth CEFUC e Silke Stock deth CENA.