Vielha, 7 de gèr de 2019.- 24 efectius terrèstres e dus elicoptèrs de Pompièrs e Emergències d’Aran, Pompièrs dera Generalitat e equipes especializades des GRAF trabalhen ena estabilizacion deth huec forestau declarat anet en Arties ena Val d’Aran, qu’afectat ues 70 ectares de pastures segontes informèc eth cap der operatiu Manel Bosch.

Es trabalhs d’escandiment der incendi, qu’encara se ne desconeish era sua origina, consistissen ena monitorizacion deth madeish entath confinament deth huec.

Es Pompièrs trabalhen en tres zònes entà estabilizar er incendi e tractar de dirigí’c enquiath hons deth barranc de Salider a on se deisharà cremar de forma controtlada. Es Pompièrs trabalhen damb huec tecnic apiejat damb estruments manuaus e eth supòrt des elicoptèrs.

Des de prumèra ora deth maitin s’a activat er operatiu de coordinacion deth Conselh Generau d’Aran damb era participacion deth sindic d’Aran, Carlos Barrera, coma responsable màxim der operatiu, eth vicesindic d’Aran, Cesar Ruiz Canela, es conselhèrs de Territòri e d’Agricultura, Ramaderia e Miei Naturau, José Antonio Boya e José Enrique Arró, eth conselhèr delegat de Pompièrs Emergències d’Aran, Joan Canalias, e es responsables operatius, Manel Bosch e Antoni Tahull, cap deth Parc de Pompièrs de Vielha.

Es trabalhs entara estabilizacion der incendi se repreneràn deman dimars as 08.30 ores. Segontes informèc er inspector cap der airau GRAF, Marc Castellnou, deman se destinaràn 30 efectius terrèstres e se mantieràn es dus elicoptèrs enes prètzhèts d’escandiment.

Er incendi a cremat enquias 18.00 ores 100 ectares de pastures.